Astanada bıznes sýbektisi І-shi toptaǵy múgedekke 3 mıllıonnan astam teńge turatyn qurylǵyny syıǵa tartty
ASTANA. Jeltoqsannyń 31-i. QazAqparat /Gúlmıra Álıakparova/ - Jańa jyldyń qarsańynda Astanadaǵy «Asia Park» saýda, oıyn-saýyq ortalyǵy І-shi toptaǵy múgedek, Aýǵan soǵysynyń qatysýshysyna satylarmen ońaı kóterilip-túsýge múmkindik beretin qurylǵyny syıǵa tartty,
dep habarlaıdy QazAqparat.
Otbasylyq demalystardy ótkizýge laıyqtalǵan «Asia Park» saýda, oıyn-saýyq ortalyǵy ústimizdegi jylǵy jeltoqsan aıynda ashylǵan bolatyn. Bıznestiń áleýmet aldyndaǵy jaýapkershiligin jete sezinetin Ortalyq basshylyǵy, «Qazaqstannyń múgedekter konfederatsııasy» respýblıkalyq qoǵamdyq birlestigimen kelise otyryp, І-shi toptaǵy múgedek, burynǵy áskerı ushqysh, Aýǵan soǵysynyń qatysýshysy elordalyq Vladıslav Gabıdýllınge satylarmen ońaı kóterilip-túsýge múmkindik beretin qurylǵyny syıǵa tartýǵa sheshim qabyldaǵan. Japondyq mehanıkalyq qurylǵynyń quny 3 mıllıonnan astam teńge turady.
Qazaqstannyń múgedekter konfederatsııasynyń prezıdenti Iran Omarbekovtyń aıtýynsha, júrek ınsýltinen keıin arbaǵa tańylǵan V.Gabıdýllın lıftileri isten shyqqan kópqabatty turǵyn úıdiń 4-shi qabatynda turady jáne oǵan dalaǵa shyǵyp taza aýa jutý ońaıǵa soqpaıdy.
I.Omarbekov atalmysh qaıyrymdylyq sharasy, basqa da bıznes sýbektileriniń áleýmet aldyndaǵy jaýapkershiligin arttyra túsedi degen senimin bildirdi.
Aıta keteıik, Astanada 14 myńǵa jýyq kem-baǵal jan turady. Onyń 30 paıyzyna arbanyń ǵana kómegimen júrip-turý múmkin bolsa, onyń 10-15 paıyzy atalmysh qurylǵylarǵa muqtaj.
