Astanada «Bıznes po po-kazahskı v Amerıke» komedııasynyń tusaýkeseri ótti
ASTANA. QazAqparat - Elordada rejısser Jeńishan Momyshevtyń «Bıznes po po-kazahskı v Amerıke» komedııasynyń tusaýkeseri bolyp ótti, dep habarlaıdy «QazAqparat» HAA tilshisi.
Aıta ketsek, «Bıznes po po-kazahskı v Amerıke» komedııasy 2016 jyldyń jeltoqsan aıynda jaryqqa shyqqan «Bıznes po kazahskıı» fılminiń jalǵasy. Ázil-qaljyńǵa qurylǵan tyń týyndyda basty róldi Nurlan Qoıanbaev, Jan Baıjanbaev, Qajet Smaǵulov pen Gúlnaz Jolanova oınaıdy. Komedııada Jomart esimdi jigit (Nurlan Qoıanbaevtyń róli) óziniń qonaq úıine álemdik mártebe alý úshin Amerıkanyń Los-Andjeles qalasyna jol tartady. Alaıda issapar barysy qyzyqty hıkaıaǵa aınalyp ketedi.
Astanada ótken fılmniń tusaýkeserine QR Aqparat jáne kommýnıkatsııalar mınıstri Dáýren Abaev, Mádenıet jáne sport mınıstri Arystanbek Muhamedıuly, Astana ákimi Áset Isekeshev, depýtat Gennadıı Shıpovskıh keldi. Sportshylardan óz sózinde Nurlan Qoıanbaevty jerlesim dep qalǵan Ilıa Ilın boı kórsetse, ánshilerden Tamara Asar qatarly birqatar ánshiler kelgen. Elimizge tanymal ár túrli salanyń ókilderi kınony kóppen birge tamashalady.
«Árıne, fılmniń úshinshi bólimin túsirý úshin tipti baıqaý jarııalaýdy oıladyq. Kórermenderdiń ózi baǵa berýshi bolǵandyqtan, ózderin de aldaǵy jobalarǵa atsalystyrsaq deımiz. Keıde «Bıznes po kazahskıı v Evrope», «Bıznes po kazahskıı v Afrıke» sekildi fılmder týraly oılaısyń...», - deıdi komedııada basty róldi oınaǵan akter ári jobanyń bas prodıýsseri Nurlan Qoıanbaev.
Ol óz sózinde qazaqsha degen sózdi jaǵymsyz dúnıege teńeýdi qoldamaıtynyn aıtady.
«Qazaqsha degen keremet sóz. Bul uǵymdy biz jaǵymdy jaqqa qaraı jarnamalaýymyz kerek. Eger jaqynyraq tanysa bastasaq, Qazaqstanda bárimiz bir-birimizben týys bolyp shyǵamyz. Biz ózimizdi rý men júzge Tursynbek Qabatov aıtqandaı, shashyraý úshin emes, birigý úshin jatqyzamyz. Sondyqtan, týystar týraly fılm óte mańyzdy. Meıli qalada, meıli aýylda tursańyz da, sizdi báribir týystyq qarym-qatynas eshqaıda jibermeıdi. Biz árqashan birgemiz. Árıne, álem ózgerip jatyr. Sondyqtan, qarym-qatynasty saqtap qalý úshin kóbirek bir-birimizdi izdeýimiz kerek dep oılaımyn», - deıdi ol.
