Astanada bıznes qoǵamdastyq ókilderiniń arasynda alǵash ret spartakıada ótti
ASTANA. QazAqparat - El Táýelsizdiginiń 25 jyldyǵyna oraı elorda ákimdiginiń qoldaýymen alǵash ret kásipkerler arasynda qalalyq spartakıada ótti, dep habarlaıdy elorda ákimdiginiń baspasóz qyzmeti.
Jarysqa sporttyń alty túrinen elorda bazarlarynyń 60-qa jýyq qyzmetkeri qatysty.
Kásipkerler shaǵyn fýtboldan, basketboldan, armrestlıngten, asyq atýdan, kir kóterýden jáne arqan tartýdan jarysty. Uıymdastyrýshylardyń aıtýynsha, aldaǵy ýaqytta mundaı saıystardy ótkizý ıgi dástúrge aınalmaq.
«Elorda bazarlarynan 12 komanda quryldy. Astana ákimi Áset Isekeshevtiń usynysymen biz bul spartakıadany dástúrli sharaǵa aınaldyrý týraly sheshim qabyldadyq. Qazirgi ýaqytta osyndaı taǵy birneshe jarys ótkizý múmkindikterin qarastyryp jatyrmyz», - deıdi Sporttyq-buqaralyq sharalardy ótkizý jónindegi dırektsııanyń basshysy Saıranbek Ábilqaıyrov.
Týrnırdiń qorytyndysy boıynsha «Qamqor» bazarynyń komandasy birinshi oryn alsa, ekinshi oryn «Oń olja» bazarynyń komandasyna, úshinshi oryn «Kók bazar» saýda bazarynyń ókilderine buıyrdy.
«Bizdiń aramyzda kásibı sportshylar joq, biraq bizdiń búgingi jeńisterimiz ben jeńilisterimiz biz úshin úlken mánge ıe. Áriptesterimizben aldaǵy ýaqytta da sporttyq jarystarda jıi kezdesip turamyz dep úmittenemiz», - deıdi «Sharyn» komandasynyń kapıtany Serikbaı Tilegenov.
