Astanada «Bizdiń Prezıdentimiz» kitabynyń tusaýkeseri ótti
Shara Bilim kúnin merekeleý jáne jańa oqý jylynyń bastalýynyń qurmetine uıymdastyryldy, dep habarlaıdy kitaphananyń baspasóz qyzmetinen.
Kezdesýge joǵary synyp oqýshylary - oqý ozattary, ıntellektýaldy jáne sporttyq jarystardyń jeńimpazdary shaqyryldy. Olar alǵashqylardyń biri bolyp Astananyń kórikti ornyna aınalǵan jańa ǵımaratqa bas suqty. Interaktıvti ekspozıtsııa kontentin zerdeleý, Memleket basshysynyń jeke kitaphanasymen tanysý oqýshylardyń zor qyzyǵýshylyǵyn týdyrdy.
Jınalǵan jetkinshekterdiń aldynda Qazaqstan Respýblıkasy Prezıdenti kantselıarııasynyń bastyǵy, QR Tuńǵysh Prezıdentiniń - Ult Kóshbasshysynyń kitaphanasynyń dırektory mindetin atqarýshy M.B.Qasymbekov sóz sóıledi. Ol kezdesý maqsattary týraly aıtyp, balalardy kitaphanamen tyǵyz yntymaqtasýǵa shaqyrdy. M.Qasymbekov kitaphananyń múmkindikterin, onyń Qazaqstannyń jańa tarıhyna qyzyǵýshylyq tanytqan barlyq jandar úshin ashyqtyǵyn erekshe atap ótti.
Kezdesý barysynda Qazaqstan Respýblıkasynyń Tuńǵysh Prezıdentiniń kitaphanasynda basyp shyǵarylǵan Nursultan Nazarbaev týraly «Bizdiń Prezıdentimiz» derekti povesiniń tusaýkeseri ótti.
Kitap ortańǵy jáne joǵarǵy synyp oqýshylaryna arnalǵan. «Kitaptyń negizgi ıdeıasy - Elbasynyń ómiri men qyzmeti týraly balalarǵa túsinikti tilmen jetkizý boldy. Kitap orys tilinde 23 myń danamen basyp shyǵaryldy. Qazir ol memlekettik tilde shyǵarýǵa ázirlenýde. Jaqyn arada kitaptar aımaqtarǵa bólinip, ondaǵy bilim mekemelerine jetkiziledi. Kitaptyń myńnan astam danasyn jetkizý kózdelip otyrǵan birinshi aımaq - Jambyl oblysy bolmaq», - dep atap ótti M.B.Qasymbekov. Bul kitaptyń avtorlary Nursultan Nazarbaevtyń qıyn ári tańǵajaıyp ómir joly - qarapaıym aýyl balasynan Memleket basshysy jáne álemdik deńgeıdegi saıasatker dárejesine deıingi kóterilgen ǵumyr soqpaǵy týraly uǵynyqty tilde baıandaıdy. Týyndy taraýlary Nursultan Nazarbaevtyń týǵan ólkesine, onyń mektep jyldary týraly áńgimelerine, Ýkraınadaǵy oqýyna, domna peshiniń janynda ótkizgen eńbek jyldaryna, aımaq jáne respýblıka basshysy retindegi taǵdyryna arnalǵan. Kitaptyń sońǵy «Táýelsizdiktiń jarqyn joldary» taraýyna elimizdiń bolashaǵyn aıqyndaıtyn búgingi kúnderimiz arqaý bolǵan.