Astanada «Biz - Jeńistiń muragerlerimiz!» estafetasy bastaldy
Estafeta QR Ulttyq gvardııasynyń elordalyq 5573 jedel maqsatty brıgadasynyń platsynda bastaldy. Bul týraly QR Ulttyq gvardııasynyń baspasóz qyzmeti habarlady.
Ulttyq gvardııanyń basqarma ókilderiniń jáne brıgadanyń tolyq jeke quramynyń, sonymen qatar, Uly Otan soǵysy ardagerleriniń, Ulttyq gvardııanyń ardagerler Keńesi ókilderiniń qatysýymen estafetanyń basty atrıbýty ofıtserler men kelisim boıynsha boryshyn ótep jatqan áskerılerden turatyn arnaıy topqa tabys etildi.
Bul Jaýyngerlik Týmen Uly Otan soǵysy bastalǵan sátte 29-shy dıvızııanyń jaýyngerleri jaýǵa atoılap shaýyp, qan maıdanǵa kirgen bolatyn. Dıvızııanyń aıbyn jáne jaýyngerlik dańq belgisi keıin Aqmolada jańadan jasaqtalǵan qazaqstandyq muragerlerine tabystaldy.
Qazaqstandyq dıvızııa Stalıngrad úshin shaıqasty. Osy oraıda jaýyngerlerdiń óshpes erligi men Otan úshin otqa túser qaısarlyǵyna qurmet retinde 29-shy atqyshtar dıvızııasyna 1943 jyldyń 1 naýryzynda 72-shi gvardııalyq atqyshtar dıvızııasy mártebesi berilgen bolatyn. Bólemshe Jeńisti Chehoslovakııada qarsy aldy.
Jaýyngerler bas-aıaǵy 2 850 shaqyrymdy eńserip, jaýdan 721 eldi mekendi, 13 iri qalany azat etip, 16 ózenniń qyl kópirinen ótken eken.
Óziniń jaýyngerlik joryq jolynda dıvızııa jeke quramy urystyń tek alǵy shebinen kórinýi kóp nárseni ańǵartsa kerek. Bul dıvızııanyń jaýjúrek ulandary «otqa kúımes, sýǵa batpas, biregeı» dep atalyp, erlikteriniń maıdan dalasyna ańyzdaı taraǵany da shyndyq.
Uly Otan soǵysy jyldarynda dıvızııanyń 18 myńnan astam ofıtseri men jaýyngeri orden, medalmen marapattalsa, otyz biri Keńes Odaǵynyń Batyry atanǵan.
Erlik urpaqqa - uran. Ol eshýaqytta da umytylmaq emes. Gvardııashy-batyrlardyń jarqyn beıneleri men ólsheýsiz batyrlyq isteri urpaq esinde máńgilik saqtalmaq. Olar Otan úshin qyzmet etýdiń, qajet kezinde týǵan el men jer úshin jan qııýdyń jarqyn úlgisi men antqa adaldyqty kórsetti.
2014 jyly qarasha aıynda, Reseı Qarýly Kúshteriniń Ortalyq murajaıynda saqtalyp kelgen 72-shi gvardııalyq atqyshtar dıvızııasynyń Jaýyngerlik Týynyń týra kóshirmesi Qazaqstannan barǵan resmı delegatsııaǵa - «Aýǵan soǵysy ardagerleri men múgedekteriniń Odaǵy» qoǵamdyq uıymynyń ókilderine berilgen bolatyn.
2015 jyldyń 10 qańtarda - «Qazaqstan Respýblıkasynyń Ulttyq ulany týraly» Zańǵa Prezıdent qol qoıylǵan kúni, Ulttyq ulannyń uıymdastyrýymen ótkizilgen gala-kontsertinde atalǵan 72-shi gvardııalyq atqyshtar dıvızııasynyń Jaýyngerlik Týynyń kóshirmesi qasterlep, saqtaý úshin Astanadaǵy ulandyq jedel brıgadaǵa saltanatty túrde tabys etildi.
Aıta keteıik, 92 táýlikke sozylatyn estafeta barysynda 70-shi gvardııalyq atqyshtar dıvızııasy Jaýyngerlik Týynyń kóshirmesi bas-aıaǵy 10 000 shaqyrymnan asa jerge tasymaldanyp, elimizdiń 25 qalasynda jelbireıdi. Al 7 mamyr - Otan qorǵaýshylar kúni Uly Otan soǵysyńdaǵy Jeńistiń 70 jyldyǵyna oraı Elordada ótkiziletin sherýde ulandyqtar Jaýyngerlik Týdy alyp shyǵýdy josparlap otyr.Estafeta sońynda Tý el júregi - Astanaǵa qaıtyp oralyp, joǵaryda atap ótkenimizdeı áskerı sherýdegi qurmet belgileriniń birine aınalmaqshy.
Aýqymdy is-shara Uly Jeńistiń 70 jyldyǵyn merekeleýdiń TMD memleket basshylarynyń qol qoıǵan jospary men atalǵan mereıtoıdy Qazaqstan Respýblıkasynda aıryqsha atap ótý kontseptsııasy aıasynda uıymdastyrylyp otyr.
Jeńis estafetasy 3 aqpan men 5 mamyr aralyǵynda ótkizilip, oǵan Ulttyq ulannyń qurylymdyq áskerı bólimderi, ardagerler uıymdary, orta bilim berý oryndarynyń oqýshylary, áskerı-patrıottyq klýbtardyń tárbıelenýshileri, stýdentter qaýymy, qoǵamdyq uıymdar men ózge de múddeli mekemelerdiń ókilderi qatysatyn bolady.
Sonymen qatar estafeta barysynda Jaýyngerlik Týdy tabystaý rásiminen ózge maıdanger babalarymyzǵa arnalǵan taǵzym sharalary, Otan úshin ot keshken ardagerler qaýymymen kezdesýler, óskeleń urpaqty erlik pen órlikke baýlý sabaqtary, ár túrli kórmeler men áskerı-patrıottyq fılmderdiń kórsetilimderi uıymdastyrylmaq.
3 aqpan kúni respýblıkalyq estafetanyń bastaý alýynyń da ózindik ereksheligi bar. Óıtkeni, dál 1943 jyldyń 2 aqpan kúni soǵystyń aldaǵy baǵyt-baǵdaryn, talaıly taǵdyryn aıqyndaǵan Stalıngrad túbindegi keskilesken shaıqas aıaqtalǵan edi. Jáne qaıtara atap óterligi, osy maıdanda kórsetken ǵalamat erlikteri úshin 29-shy dıvızııaǵa 72-shi gvardııalyq mártebesi berildi.
