Astanada «Biz Jeńistiń muragerlerimiz!» estafetasy bastalady
Keń baıtaq qasterli elimiz boıynsha ótetin estafetanyń negizgi atrıbýty retinde qan maıdannyń qıyn-qystaý kúnderi, anyǵynda 1941 jyldyń 15 jeltoqsanynda búgingi elordamyzdyń aspany astynda jasaqtalǵan 72-shi gvardııalyq atqyshtar dıvızııasynyń Jaýyngerlik Týynyń kóshirmesin ataýǵa bolady.
«Tarıh taǵylymyna toqtalsaq, bul Jaýyngerlik Týmen Uly Otan soǵysy bastalǵan sátte 29-shy dıvızııanyń jaýyngerleri jaýǵa atoılap shaýyp, qan maıdanǵa kirgen bolatyn. Sońǵy demderi men sońǵy sarbazy qalǵansha Otan úshin ot keshken bul dıvızııanyń aıbyn jáne jaýyngerlik dańq belgisi keıin Aqmolada jańadan jasaqtalǵan qazaqstandyq muragerlerine tabystaldy.Soǵysta qazaqstandyq 72-shi dıvızııanyń jeke quramy da sońdaryna óshpes erliktiń izin qaldyrdy. Stalıngrad úshin bolǵan keskilesken shaıqasta olar 64-shi Armııanyń jaýyngerlerimen ıyq tirese otyryp, qardaı boraǵan ajal oǵynyń astynda Otan úshin jan alysyp, jan beristi. Iá, osy qan maıdan túbinde kópten beri qolǵa túspeı kelgen soǵystaǵy jeńistiń beri qaraǵany aqıqat. Bul jolda mıllıondaǵan bozdaqtar jandaryn pıda etti. Jaýjúrek aǵa býynnyń ólsheýsiz erligine myń taǵzym!», - delingen QR Ulttyq ulany baspasóz qyzmetiniń habarlamasynda.
Osy oraıda jáne bir derekti alǵa tarta ketsek, ol jaýyngerlerdiń óshpes erligi men Otan úshin otqa túser qaısarlyǵyna qurmet retinde 29-shy atqyshtar dıvızııasyna 1943 jyldyń 1 naýryzynda 72-shi gvardııalyq atqyshtar dıvızııasy mártebesi berilgen bolatyn.
72-shi gvardııalyq atqyshtar dıvızııasynyń munan keıingi jaýyngerlik joryq joly Kýrsk maıdanynda, odan keıin Harkov, Merefý, Krasnograd, Kırovograd qalalary úshin, Dnepr men ıÝjnyı Býga ózenderinen ótý, Rýmynııa, Transılvanııa, Vengrııa, Avstrııa men Chehoslovakııany azat etý úshin bolǵan qyran-keski shaıqastarmen jalǵasyn tapty.
Aıtýǵa ońaı bolǵanmen, sol kúnderi dıvızııanyń Stalıngrad túbi men Praga deıin jasaǵan maıdan joly - qııamettiń tezine shydaý men Otan úshin janqııarlyq joly bolatyn. Osy aralyqta kúrzi etikpen qasirettiń qara topyraǵyn tolarsaqtan keshken aıbyndy jaýyngerler bas-aıaǵy 2 850 shaqyrymdy eńserip, jaýdan 721 eldi mekendi, 13 iri qalany azat etip, 16 ózenniń qyl kópirinen ótken eken.
Óziniń jaýyngerlik joryq jolynda dıvızııa jeke quramy urystyń tek alǵy shebinen kórinýi kóp nárseni ańǵartsa kerek. Bul dıvızııanyń jaýjúrek ulandary «otqa kúımes, sýǵa batpas, biregeı» dep atalyp, erlikteriniń maıdan dalasyna ańyzdaı taraǵany da shyndyq.
Uly Otan soǵysy jyldarynda dıvızııanyń 18 myńnan astam ofıtserleri men jaýyngerleri orden, medaldarmen marapattalsa, otyz biri Keńes Odaǵynyń Batyry atanǵan.
Erlik urpaqqa - uran. Ol eshýaqytta da umytylmaq emes. Gvardııashy-batyrlardyń jarqyn beıneleri men ólsheýsiz batyrlyq isteri urpaq esinde máńgilik saqtalmaq. Olar Otan úshin qyzmet etýdiń, qajet kezinde týǵan el men jer úshin jan qııýdyń jarqyn úlgisi men antqa adaldyqty kórsetti.
2014 jyly qarasha aıynda, Reseı Qarýly Kúshteriniń Ortalyq murajaıynda saqtalyp kelgen 72-shi gvardııalyq atqyshtar dıvızııasynyń Jaýyngerlik Týynyń tup-týra kóshirmesi Qazaqstannan barǵan resmı delegatsııaǵa - «Aýǵan soǵysy ardagerleri men múgedekteriniń Odaǵy» qoǵamdyq uıymynyń ókilderine berilgen bolatyn.
2015 jyldyń 10 qańtarda - «Qazaqstan Respýblıkasynyń Ulttyq ulany týraly» Zańǵa Prezıdent qol qoıylǵan kúni, Ulttyq ulannyń uıymdastyrýymen ótkizilgen «Babalar dástúri - urpaqqa amanat» gala-kontsertinde atalǵan 72-shi gvardııalyq atqyshtar dıvızııasynyń Jaýyngerlik Týynyń kóshirmesi qasterlep, saqtaý úshin Astanadaǵy ulandyq jedel brıgadaǵa saltanatty túrde tabys etildi.
Al óz kezeginde, bul uıymdastyrylyp otyrǵan estafeta sharasy búgingi beıbit ómir úshin ajalmen betpe-bet arpalysqa túsip, boıyndaǵy qasyq qany qalǵansha týǵan eldi qorǵaýdyń óshpes erligin kórsetken jalyndy gvardııalyq dıvızııa jeke quramyna taǵzym kórsetý, maıdangerlerdiń rýhtaryna bas ııý bolyp tabylady. Qasterli Tý Ulttyq ulannyń quramalyq bólimsheleri ornalasqan el aýmaǵyndaǵy barlyq qalalarda qoldan-qolǵa saltanatty túrde tabystalatyn bolady. Al 7 mamyr - Otan qorǵaýshylar kúni Uly Otan soǵysyńdaǵy Jeńistiń 70 jyldyǵyna oraı Elordada ótkiziletin sherýde ulandyqtar Jaýyngerlik Týdy alyp shyǵýdy josparlap otyr.
Aıtyp ótsek, aýqymdy is-shara Uly Jeńistiń 70 jyldyǵyn merekeleýdiń TMD memleket basshylarynyń qol qoıǵan jospary men atalǵan mereıtoıdy Qazaqstan Respýblıkasynda aıryqsha atap ótý kontseptsııasy aıasynda uıymdastyrylyp otyr.
Jeńis estafetasy 3 aqpan men 5 mamyr aralyǵynda ótkizilip, oǵan Ulttyq ulannyń qurylymdyq áskerı bólimderi, ardagerler uıymdary, orta bilim berý oryndarynyń oqýshylary, áskerı-patrıottyq klýbtardyń tárbıelenýshileri, stýdentter qaýymy, qoǵamdyq uıymdar men ózge de múddeli mekemelerdiń ókilderi qatysatyn bolady.
Jaýyngerlik Týdy saltanatty túrde qabyldap alýshy top quramy elge eńbek sińirýdiń, úzdik qyzmet etýdiń jarqyn úlgisin kórsete bilgen ofıtserler men kelisimshart negizindegi áskerı qyzmetshiler, sondaı-aq, ardagerler jáne tyl eńbekkerleri uıymdarynyń ókilderinen jasaqtalady.
Sonymen qatar estafeta barysynda Jaýyngerlik Týdy tabystaý rásiminen ózge maıdanger babalarymyzǵa arnalǵan taǵzym sharalary, Otan úshin ot keshken ardagerler qaýymymen kezdesýler, óskeleń urpaqty erlik pen órlikke baýlý sabaqtary, ár túrli kórmeler men áskerı-patrıottyq fılmderdiń kórsetilimderi uıymdastyrylmaqshy.
3 aqpan kúni respýblıkalyq estafetanyń bastaý alýynyń da ózindik ereksheligi bar. Óıtkeni, dál 1943 jyldyń 2 aqpan kúni soǵystyń aldaǵy baǵyt-baǵdaryn, talaıly taǵdyryn aıqyndaǵan Stalıngrad túbindegi keskilesken shaıqas aıaqtalǵan edi. Jáne qaıtara atap óterligi, osy maıdanda kórsetken ǵalamat erlikteri úshin 29-shy dıvızııaǵa 72-shi gvardııalyq mártebesi berildi.
92 táýlikke sozylatyn estafeta barysynda 70-shi gvardııalyq atqyshtar dıvızııasy Jaýyngerlik Týynyń kóshirmesi bas-aıaǵy 10 000 shaqyrymnan asa jerge tasymaldanyp, elimizdiń 25 qalasynda jelbireıdi. Estafeta sońynda Tý el júregi - Astanaǵa qaıtyp oralyp, joǵaryda atap ótkenimizdeı áskerı sherýdegi qurmet belgileriniń birine aınalmaqshy.
72-shi gvardııalyq atqyshtar dıvızııasynyń Jaýyngerlik Týynyń kóshirmesin saltanatty túrde tabystaý men estafetaǵa qatysýshy taraptardyń kezdesý rásimi Astana qalasynda - 2015 jyldyń 3 aqpan kúni Qazaqstan Respýblıkasy Ulttyq ulanynyń Qaraótkel kentindegi 5573 áskerı bóliminde ótedi, shara saǵat 09:30-ta bastalady; Qaraǵandy qalasynda - K.S.Stanıslavskıı atyndaǵy oblystyq orys drama teatrynda saǵat 16:00-de bastalady.
