Astanada bıyl jarty mıllıon aǵash, 9 mıllıon túp gúl otyrǵyzylady - I. Tasmaǵambetov
ASTANA. 23 sáýir. QazAqparat /Jasulan Amanbaıuly/ - Búgin Astanada qala ákimi Imanǵalı Tasmaǵambetov jalpyqalalyq senbilikke qatysty.
Aldyn ala berilgen málimetterge sáıkes, jalpyqalalyq senbilikke 100 myńnan astam adam, jalpy sany 4500 kásiporyn qamtylyp, arnaıy 318 avtomashına tartylǵan. Olar búgin respýblıkada ótip jatqan «Jasyl japyraq» sharasy aıasynda elordada 4307 túp aǵash pen 25 myńnan astam buta otyrǵyzbaq. Astana qalasynyń ákimi Imanǵalı Tasmaǵambetov senbilik barysynda Kóktal kentindegi D.Babataıuly kóshesinde ornalasqan №40 orta mektep aýmaǵynda aǵash otyrǵyzýǵa qatysty. Onyń aıtýynsha, bıyl eloradaǵy aǵashtardyń sany shamamen jarty mıllıonǵa artady. «QR Prezıdentiniń tapsyrmasymen biz qalany kógaldandyrý jumysyna úlken kóńil bólip kelemiz. Eger de biz byltyr 20 myń túp aǵash eksek, bıyl 400 myń aǵash otyrǵyzýdy mejelep otyrmyz. Eger 3 jyl buryn jaz mezgilderinde 2 mln. astam gúl egilse, qazir biz 9 mln. gúl egemiz»,-dep atap kórsetti ol.
«Jalpyqalalyq senbilikte qystan qalǵan 190 qoqys orny tazalanyp, 1300 tekshe metr qaldyq qalanyń syrtyna shyǵarylmaq. Qalada 4 myńǵa tarta jas tal egilip, 25 myńdaı kóshet otyrǵyzylady»,-dedi I. Tasmaǵambetov.
Elordanyń qalalyq bóligi kommýnaldyq sharýashylyqtar jumystarynyń arqasynda taza keıipte saqtalýda. Sondyqtan qala ákimdigi búgingi tazalyq sharasyn megapolıstiń shetki aýdandarynda ótkizýge kóńil bólgen. «Biz shet aýdandarda tek senbiliktermen shektelip qoımaımyz, elorda ákimdigi men máslıhaty qala aınalasyndaǵy eldi mekenderdi damytýdyń 3 jyldyq baǵdarlamasyn qabyldady. Astanada osyndaı 20 eldi meken bar. Ol jerlerde abattandyrý máselesi óte ótkir tur»,-dep atap ótken ákim, «máselen, Kóktal kentinde bıyldyń ózinde 3 áleýmettik nysan paıdalanýǵa beriledi»,-dedi.
Onyń atap kórsetkenindeı, jalpy barlyq kentterde baǵdarlama aıasynda 3 jyldyń ishinde 200 shaqyrym jol, 33 shaqyrym sý qubyry, 110 shaqyrym elektr jelisi júrgiziledi.
