Astanada bıyl Uly Dala dańǵylynyń qurylysy bastalady
ASTANA. QazAqparat - Elordada bıyl jáne kelesi jyly eki úlken dańǵyldyń qurylysy bastalady, dep habarlaıdy «QazAqparat» HAA tilshisi.
Bul týraly Astana qalasynyń ákimdiginde qalalyq avtomobıl joldary basqarmasynyń basshysy Ashat Qaraǵoıshın málim etti. Onyń aıtýynsha, bıyl elordada uzyndyǵy 23,4 shaqyrym bolatyn, quramyna 87,5 shaqyrym ınjenerlik jeliler kiretin 11 kóshe salynǵan. Atap aıtqanda, Q. Amanjolov kóshesinen bastap «Nurly jol» temir jol vokzalyna deıingi A. Baıtursynov kóshesi, Q.Amanjolov kóshesinen bastap jańa «Nurly jol» temir jol vokzalyna deıingi J. Nájimedenov kóshesi, «Nurly jol» temir jol vokzaly aýmaǵyndaǵy A62 kóshesi, Qabanbaı batyr dańǵylynan bastap Máńgilik el dańǵylyna deıingi ýchaskedegi №24 kóshesi, Orynbor kóshesinen bastap Kereı-Jánibek handar kóshesine deıingi ýchaskedegi Túrkistan jáne Aqmeshit kósheleri boıynsha jáne taǵy sol sekildi kósheler boıynsha jumystar júrgizilgen.
Sonymen qatar, Kishi aınalma jol sheńberinde uzyndyǵy 3 shaqyrym bolatyn, Orynbor kóshesinen bastap (burynǵy Syǵanaq) Uly Dala dańǵylyna deıingi (burynǵy Hýseın men Talal kóshesi) Sh.Beısekova kóshesin salý jumystary jalǵaspaq. Sh.Beısekova kóshesinen bastap Turan dańǵylyna deıingi ýchaskede Uly Dala dańǵylynyń qurylysy bastalatyn bolady. Atalǵan jumys Turan men Qabanbaı batyr dańǵylyndaǵy kólik shıelenisin azaıtýǵa múmkindik beredi.
«Bıylǵy jyly Táýelsizdik dańǵylynan bastap Sh.Qaldaıaqov kóshesine deıingi ýchaskedegi Uly Dala dańǵylynyń qurylysy, kelesi jyldan bastap №46 kósheden bastap №31 kóshege deıingi ýchaskedegi Táýelsizdik dańǵylynyń qurylysy bastalatyn bolady. Bul 10 myń avtokólikke jańa ákimshilik ortalyqtan ótpeı Máńgilik el dańǵyly boıynsha qalanyń Ońtústik-Shyǵys bóligine jetýge múmkindik beredi», - deıdi Ashat Qaraǵoıshın.
