Astanada bıyl 1 mln aǵash pen buta otyrǵyzylady

ASTANA. QazAqparat - Astanada jasyl aýmaqtyń kólemi artady. Bıyl elordada mıllıon jasyl jelek otyrǵyzý josparlanyp otyr. Onyń 500 myńy qalada, taǵy osyndaı mólsheri Astananyń jasyl beldeýine otyrǵyzylady. Japyraqty aǵashtarǵa basymdyq beriledi, dep habarlaıdy QazAqparat ákimdikke silteme jasap.

Elordany damytý jónindegi keńeste Memleket basshysy bes jyl ishinde Astanany baqsha qalasyna aınaldyrýdy, kópjyldyq ósimdikterdi kóbirek otyrǵyzýdy tapsyrdy.

Qalada kóktemgi aǵash otyrǵyzý jáne «Jasyl Astana» ekologııalyq aılyǵy bastaldy.

Osylaısha Abylaı han dańǵyly, Qajymuqan, Petrov, Bolekpaev, A-105, Baltaly, Alash tas joly jáne t.b. kósheleriniń boıynda aǵashtar otyrǵyzyldy.

Qalany jappaı kógaldandyrý ekologııany jaqsartýǵa, qala turǵyndary úshin demalys oryndaryn ashýǵa, elordanyń klımattyq jaǵdaıyn jaqsartýǵa múmkindik beredi.

Sońǵy bes jylda Astanada 2,6 mıllıonnan astam jasyl jelek otyrǵyzyldy.

Sonymen qatar, «Jasyl Astana» ekologııalyq aılyǵy aıasynda eńbek ujymdarynyń, qala turǵyndarynyń kúshimen polıgonǵa 555 tonnadan astam qaldyq shyǵaryldy.

Saıabaqtar men skverlerde jalpy aýdany 2,5 mln sharshy metrden astam aýmaq jınaldy.

«Jasyl Astana» ekologııalyq aılyqqa 11 myńnan astam adam, 200-den astam kásiporyndar men uıymdar, PIK jáne MIB ujymdary, shaǵyn jáne orta bıznes sýbektileri jáne t.b. qatysty.