Astanada birjaqty qozǵalysty damytý tujyrymdamasy ázirlenip jatyr

Qalalyq kólik jáne jol-kólik ınfraqurylymyn damytý basqarmasynyń málimetinshe, 2016 jyly Astanada bir jaqty qozǵalysty engizý kólik aǵynynyń ortasha jyldamdyǵyn 33% - ǵa arttyryp, joldardyń ótkizý qabiletin 25% - ǵa deıin ulǵaıtýǵa múmkindik bergen.

Mysaly, Kenesary kóshesiniń boıymen júrýdiń ortasha ýaqyty 21 mınýttan 17 mınýtqa deıin, Abaı dańǵylymen júrýdiń ortasha ýaqyty 22 mınýttan 18 mınýtqa deıin qysqardy. Al qozǵalystyń ortasha jyldamdyǵy bul rette Kenesary kóshesinde 18,4 km/saǵ-tan 24,5 km/saǵ-qa deıin, Abaı dańǵylynda 15,8 km/saǵ-tan 21 km/saǵ-qa deıin artty.

Sondaı-aq, Kenesary kóshesindegi qozǵalys qarqyndylyǵy 1 033 birlik/saǵ-tan 1 476 birlik/saǵ-qa deıin, Abaı dańǵylynda 759 birlik/saǵ-tan 17 birlik/saǵ-qa deıin ulǵaıdy.

Qazirgi ýaqytta birjaqty qozǵalys Astana kósheleriniń jalpy uzyndyǵy 15,2 km quraıtyn 7 ýchaskesinde engizilgen.

«Máselen, Buqarbaı batyr jáne Jeltoqsan kósheleriniń qıylysynda birjaqty qozǵalysty engizý qorytyndylary boıynsha taldaý Buqarbaı batyr kóshesindegi jalpy kólik aǵyny 17% (303 birlik/saǵ-tan 355 birlik/saǵ-qa deıin) ulǵaıǵanyn kórsetip otyr. Ótken kezeńde atalǵan jol ýchaskesinde JKO tirkelgen joq», - delingen habarlamada.

Basqarmanyń málimetinshe, qazirgi kezde birjaqty qozǵalysty odan ári damytý tujyrymdamasyn ázirleý jumysy júrgizilýde. Dálirek aıtqanda, kólik aǵynyna, baǵdarshamdyq retteý rejimderine, kólik quraldarynyń faza boıynsha taraý shemalaryna taldaý, sondaı-aq, jol qozǵalysynyń qazirgi jáne ózgertilgen uıymdastyrylýy kezindegi kóliktik aǵyndardy odan ári modeldeý júrgizilip jatyr.

Bul tujyrymdama kólik quraldarynyń faza boıynsha taraý shemalaryn ońtaılandyrý, qaqtyǵys núkteleri men baǵdarshamdyq fazalardyń sanyn azaıtý esebinen kólik qozǵalysynyń ortasha jyldamdyǵyn arttyrýǵa jáne jol qıylystaryndaǵy kidiristerdiń sanyn azaıtýǵa múmkindik beredi.