Astanada biryńǵaı «112» baılanys ortalyǵyn qurý josparlanýda

ASTANA. QazAqparat - «Astana - qaýipsiz qala» baǵdarlamasynyń sheńberinde elorda ákimdigi barlyq shuǵyl áreket etý suraqtary boıynsha «112» Biryńǵaı baılanys ortalyǵyn qurýǵa qatysty jumystardy júrgizip jatyr, dep habarlaıdy qalalyq ákimdiktiń resmı saıty.

IKomek qalalyq monıtorıng jáne jedel áreket etý ortalyǵynyń málimetinshe, 112 biryńǵaı baılanys ortalyǵy jedel járdem, polıtsııa jáne órt qyzmeti suraqtaryn/máselelerin biriktiredi. Tujyrymdamanyń negizine AQSh-taǵy 911 shuǵyl qyzmettiń tájirıbesi alyndy, onda jedel áreket etýdiń naqty úlgisi qalanǵan.

Atalǵan jańa qyzmettiń túrin qurý týraly máseleni Astana ákimi Baqyt Sultanov elordalyq jedel járdem stantsııasynyń bazasyn aralaý saparynda talqylady. Jumys tobyna Astana ákimdiginiń, «Jedel járdem» MKK, Polıtsııa departamenti, TJ boıynsha departamenti jáne (iKomek) «Qalalyq monıtorıng jáne jedel áreket etý ortalyǵy» MKK ókilderi kirdi. Komıssııa ókilderi 103 qyzmetiniń dıspetcherlik bóliminiń jumysymen tanysyp, shuǵyl qyzmettiń nomerlerin biriktirýde neni esepke alý qajettigi týraly máseleni talqylady. 
 

«112 biryńǵaı baılanys ortalyǵy jumystyń tıimdiligin joǵarylatyp, shaqyrtýǵa jedel áreket etýi tıis, ıaǵnı 911 shuǵyl qyzmetiniń úzdik tájirıbesin qoldanýy tıis», - dedi elorda ákimi Baqyt Sultanov.  

Eske sala keteıik, Astana buǵan deıin AQSh-tyń 109 qalalyq shuǵyl emes suraqtar boıynsha biryńǵaı nomerin qurýdaǵy tájirıbesin qoldanǵan bolatyn.

Búgin 109 nomeri kommýnaldyq qyzmetter, qoǵamdyq kólik, BEO jáne ákimdiktegi basqarmalardyń barlyq suraqtaryn biriktiredi. 11 aıdyń ishinde iKomek ortalyǵyna 870 myń ótinish kelip tússe, olardyń 99 % qalalyq kommýnaldyq qyzmettermen óńdelgen.