Astanada birneshe kassırdi aldap ketken ırandyq áıel ustaldy
ASTANA. QazAqparat - 23 qazan kúni elordalyq tártip saqshylary alaıaqtyq áreketi úshin Iran Islam Respýblıkasynyń 37 jastaǵy turǵynyn ustady, dep habarlaıdy QazAqparat Astana qalalyq Polıtsııa departamentiniń baspasóz qyzmetine silteme jasap.
Quzyrly vedomstvonyń baspasóz qyzmetinen habarlanǵandaı, 22 qazan kúni elordanyń iri oıyn-saýyq ortalyqtary men otelderinde sheteldik áıel birneshe personaldy aldap, jalpy somasy 200 myń teńgege ıe bolǵan.
«Áıel iri kýpıýrolardy (10 jáne 20 myń teńgelik) kórsete otyryp, kassırlerge jaqyndaǵan. Alaıda óz aqshasyn kassırlerge ustatpaǵan. Kassırler oǵan usaq kýpıýrolardy ustatqan ýaqytta kúdikti aqshany sanaǵan bolyp, olardyń nazaryn basqa jaqqa aýdaryp, bildirmeı aqshanyń bir bóligin qaltasyna jasyryn salyp otyrǵan. Osydan keıin aqshany usaqtaýdan bas tartyp, kassa aldynan tez ketip qalǵan», - delingen habarlamada.
Polıtsııa qyzmetkerleri anyqtaǵanyndaı, áıel Qazaqstan Respýblıkasyna týrızm maqsatynda kelip, elordanyń otelderiniń birinde turyp jatqan.
Tergeý amaldary barysynda járibenýshiler sheteldik meımandy tanyp, kúdikti ózine taǵylǵan aıyppen kelisip otyr. Sonymen birge, quqyq qorǵaýshylar álgi áıeldiń kinásin dáleldeı alarlyq vıdeojazbalardy qolǵa túsirgen.
Atalǵan fakt negizinde QR QK-niń 190-baby (alaıaqtyq) boıynsha sotqa deıingi tergeý amaldary bastaldy. Sheteldik Astana qalalyq Polıtsııa departamentiniń ýaqytsha oqshaýlaǵyshyna qamaldy.
