Astanada birqatar sport ókilderi marapattaldy
ASTANA. 16 tamyz. QazAqparat - 2007 jyly elimizdegi sportpen shuǵyldanatyn adamdardyń sany 2,3 mln. bolsa (15%), 2012 jyly bul kórsetkish 3,6 mln. adamǵa (21,6 %) jetken. Bul týraly búgin QR Sport jáne dene shynyqtyrý isteri agenttiginde Sport kúnine oraı ótken saltanatty sharada vedomstvo basshysy Erlan Qojaǵapanov aıtty.
«Qazaqstan Respýblıkasynyń Prezıdenti N. Nazarbaev aıtqandaı, salaýatty ómir salty ǵana ult densaýlyǵynyń kilti bolyp tabylady. Qazaqstannyń árbir turǵyny buqaralyq sportty damytýǵa óz úlesin qosýǵa quqyly. Búgingi sport - bul árbir qazaqstandyqtyń ómiriniń sapasy men uzaqtyǵyn, sondaı-aq ulttyń básekege qabilettiligin arttyrýdaǵy mańyzdy faktor», - dep atap ótti E. Qojaǵapanov.
Vedomstvonyń habarlaýynsha, jyl saıyn tamyz aıynyń úshinshi jeksenbisinde atalyp ótetin Sport kúnine oraı bıyl elimizdiń túkpir-túkpirinde 15-18 tamyz aralyǵynda sporttyq-buqaralyq jarystar, saltanatty jıyndar jáne dene shynyqtyrý men sportty damytýǵa úles qosqan azamattardy marapattaý rásimderi ótedi.
E. Qojaǵapanovtyń málimetinshe, bıyl «Dene shynyqtyrýdy jáne sportty damytýǵa qosqan úlesi úshin» jáne «Sporttaǵy qurmetti qyzmetker», sondaı-aq «Qurmet gramotasy» jáne «Alǵys hat» sııaqty vedomstvolyq nagradalary 244 adamǵa tabys etilgen.
Búgingi sharada Olımpıada chempıony Serik Sápıev, sport ardageri Aleksandr Shneıdmıýller, «Shahter» fýtbol komandasynyń dırektory Tarıh Tólegenov jáne basqa da sport ókilderi osyndaı marapattarǵa ıe boldy.
