Astanada birqatar memlekettik qyzmetshilerdiń jalaqysy kóbeıedi
ASTANA. QazAqparat - «Astana - adaldyq alańy» jobasy aıasynda memlekettik qyzmetshiler men bıýdjettik uıymdar qyzmetkerleriniń eńbekaqysyn kóterý júzege asyryla bastady, dep habarlaıdy QazAqparat Memlekettik qyzmeti steri jáne sybaılas jemqorlyqqa qarsy is-qımyl agenttigine silteme jasap.
Jańa joba jetekshisi Jazıra Jylqyshıevanyń aıtýynsha, tómen eńbekaqy máselesi jemqorlyq jasaýǵa ıtermeleıtin negizgi faktorlardyń biri bolyp otyr. Máselen, qylmystyq tergeýge túsken memlekettik mekeme basshylarynyń 90 protsenti oblystyq (28%) jáne aýdandyq (63%) deńgeıdegi basshylar bolyp shyqqan.
Bul rette óńirlik basshylardyń eńbekaqylary men olarǵa senip tapsyrylǵan bıýdjettik qarajat kólemi salystyrýǵa kelmeıdi. Mysaly, 146 myń teńge aılyq alatyn oblystyq basqarma basshysy 3 mıllıardtan astam teńgeni ıgerýdi kózdeıtin bıýdjettik baǵdarlamaǵa ákimshi bolady.
«Taǵy bir mysal, ekologııa basqarmasynyń bas mamany ekologııalyq zańnamany buzǵan kompanııaǵa 1 mıllıonnan astam teńgege aıyppul sala alady. Al kompanııa mamannyń buıryq jazbaýy úshin, para berip qutylady. Endi jemqorlyq qaýpi joǵary laýazymdardy anyqtap, ondaǵy qyzmetkerlerdiń eńbekaqylaryn kóterýdi usynamyz. Qosymsha qarajat qajet emes, barlyǵy bıýdjet sheńberinde bolýy tıis», - dep atap ótti Jylqyshıeva.
Onyń aıtýynsha, mundaı laýazymdardyń tizimin qurý qajettiligi buǵan deıin de birneshe ret kóterilgen.
Eńbekaqyny kóterý boıynsha pılottyq joba agenttiktiń, Ádilet mınıstrliginiń, Mańǵystaý oblysy jáne Astana qalasy ákimdikteriniń qurylymyna engizildi. Jobalyq keńse qyzmetkerleri memlekettik qyzmetshiler men bıýdjettik uıymdardyń qyzmetkerlerine eńbekaqy tóleýdi odan ári jetildirý boıynsha usynystar ázirleıtin bolady.
Eske sala ketsek, elordada Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana ákimdigimen birlesken «Astana - adaldyq alańy» jobasy bastaý aldy. Búgin Memlekettik qyzmet isteri jáne sybaılas jemqorlyqqa qarsy is-qımyl agenttiginiń Tóraǵasy Alık Shpekbaev pen Astana qalasynyń ákimi Áset Isekeshev «Astana adaldyq alańy» jobasynyń jarǵysyna saltanatty túrde qol qoıdy.
