Astanada birqatar kóshelerde kólik qozǵalysy shekteledi
ASTANA. QazAqparat - Astanada Qazaqstan halyqtarynyń birligi kúnin merekeleý jáne daıyndyq kezeńinde Táýelsizdik dańǵylynda «Qazaq Eli» alańy men oǵan jaqyn kóshelerde kólik quraldarynyń qozǵalysyna shekteý qoıylady, dep habarlaıdy QazAqparat Astana qalalyq ІІD baspasóz qyzmetine silteme jasap.
«Qazaqstan halyqtarynyń birligi kúnin toılaý jáne daıyndyq kezeńinde qoǵamdyq tártip pen jol qaýipsizdigin qamtamasyz etý maqsatynda Táýelsizdik dańǵylynyń boıynda «Qazaq Eli» alańynyń aldynda jáne oǵan jaqyn kóshelerdiń ýchaskelerinde kólik quraldarynyń qozǵalysyna tyıym salyndy», - dep habarlady Astana ІІD-den.
Atap aıtqanda, 28 sáýir 17:00-den bastap Táýelsizdik dańǵylynyń Baıtursynov kóshesinen Nájimedenov kóshesine deıingi bóligi 2 mamyr 00:00-ge deıin jabyq bolady. Budan bólek, 1 mamyr 8:00-den 15:00-ge deıin Baıtursynov kóshesiniń Amanjolov kóshesi jaǵy men Momyshuly dańǵyly beti, Táýelsizdik dańǵylynyń Qoshqarbaev kóshesi jaǵy, Qaldaıaqov kóshesiniń M-3 kópiri beti (Syǵanaq kóshesiniń tarapy) men Nájimedenov kóshesiniń Amanjolov kóshesi jaǵynda kólikterdiń júrýine shekteý qoıylady.
Sonymen qatar, qoǵamdyq kólik qozǵalysy kedergisiz júzege asyrylady. Tek, Táýelsizdik dańǵylynda alańnyń aldymen júrýge tyıym salynady, dep atap ótti polıtsııada.
Óz kezeginde 9 mamyr 12:00-15:00 aralyǵynda Táýelsizdik dańǵylynyń keı bóligi kólikterdiń qozǵalysy úshin jabyq bolady.
Sondaı-aq, Táýelsizdik dańǵylyna jaqyn ornalasqan - Nájimedenov, Baıtursynov, Qoshqarbaev, Momyshuly, Maılın, Sharl De Gol, Kúıshi Dına, Muńaıtpasov kósheleriniń keı bóliginde qozǵalysqa shekteý qoıý josparlanýda.
Astana qalalyq ishki ister departamenti qala turǵyndary men qonaqtarynan atalmysh kezeńde qozǵalys baǵyttaryn aldyn ala josparlap alýlaryn suraıdy.
