Astanada birqatar elder esirtkiniń zańsyz aınalymy máselesin talqylady
ASTANA. QazAqparat - Esirtki aınalymyna tosqaýyl qoıý salasynda óńirlik yntymaqtastyq boıynsha Memorandýmyna qatysýshy elder is-qımyldar toptamasyn qabyldady. Bul týraly QR Syrtqy ister mınıstriniń orynbasary Erjan Ashyqbaev málim etti, dep habarlaıdy QazAqparat.
Atap aıtqanda, búgin esirtki aınalymyna qarsy turý salasynda óńirlik yntymaqtastyq boıynsha ózara túsinistik týraly Memorandýmyna qatysýshy elderdiń onynshy sholý kezdesýiniń joǵary deńgeıdegi otyrysynda tıisti Deklaratsııa qabyldandy.
«Búgingi ótken sharanyń qorytyndy qujatynyń basty nátıjesi Ortalyq Azııa memleketteriniń, Ázerbaıjan men Reseıdiń esirtkiniń zańsyz aınalymyna qarsy kúres jolyndaǵy birlesken is-qımyldar toptamasynyń qabyldanýyna qatysty bolyp otyr. Aýǵanstannan shyqqan esirtkiniń 20-dan 25 paıyzyna deıingi úlesi Ortalyq Azııa óńiri, Reseı, Ázerbaıjan elderi aýmaǵy arqyly tranzıt retinde ótedi. Sondyqtan biz úshin de esirtkiniń zańsyz aınalymy qaýipsizdigimizge, bolashaǵymyzǵa tónip turǵan úlken qaýip. Osy oraıda birlesken sharalardyń qabyldanýy, birlesken is-áreketterdiń úılestirilýi óte mańyzdy»,- dedi E. Ashyqbaev.
Onyń sózine qaraǵanda, sonymen qatar jıyn barysynda Almatydaǵy Zańsyz esirtki aınalymyna qarsy kúres Ortalyq Azııa óńirlik aqparattyq úılestirý ortalyǵy jumysyna da sholý jasaldy.
«Bul osy saladaǵy qazaqstandyq bastamalardyń eń úlken úlgisi dep ataýǵa bolady. Ortalyq jumysy nátıjesinde aımaq memleketteriniń esirtkige qarsy birlesken operatsııalary iske asyrylýda. Sondaı-aq onyń jumysynyń arqasynda Ortalyq Azııa elderinde quqyq qorǵaý mekemeleri qyzmetkerleriniń esirtki aınalymyna qarsy jumystarynyń tájirıbesi jaqsartylýda»,-dedi Ashyqbaev.
