Astanada birinshi jartyjyldyqta týberkýlezge shaldyǵý oqıǵalary 15,6 paıyzǵa tómendedi
ASTANA. 26 shilde. QazAqparat - Elordada alǵashqy 6 aıda týberkýlezge shaldyǵý oqıǵalary 15,6% tómendedi, al bul indetten kóz jumǵandardyń sany 32,7% kemidi.
Bul týraly astana.kz saıtyna Densaýlyq saqtaý basqarmasynan habarlady.
Kórsetkishterdiń tómendeýine 2011-2015 jyldarǵa arnalǵan «Salamatty Qazaqstan» baǵdarlamasy sep bolǵan, baǵdarlamanyń maqsaty medıtsınalyq qyzmet kórsetýdiń shyǵyndy az qajet etetin túrlerine aýysý úshin jaǵdaı jasaý arqyly densaýlyq saqtaý júıesin qarqyndy damytý bolyp tabylady. Baǵdarlamanyń damýynyń negizgi baǵyttarynyń biri - qoǵamda azamattardyń aýrýlardan, múgedektikten jáne mezgilsiz qaza bolý jaǵdaılaryn azaıtý.
Osyǵan baılanysty Astananyń ár turǵynynyń qalalarda jáne elordalyq respýblıkalyq ortalyqtarda dárigerdi, statsıonardy jáne emhanany óz erkimen tańdaý quqyǵyna baǵyttalǵan jumystar júrgizilip jatyr. Ulttyq skrınıngtik baǵdarlama aıasynda áleýmettik mańyzdy aýrýlardy jáne olardyń týyndaý táýekelderiniń faktorlaryn erte anyqtaıtyn 11 túrli skrınıngtik zertteý arqyly qala halqyn mindetti profılaktıkalyq tekserý jumystary jalǵasýda.
«Salamatty Qazaqstan» memlekettik baǵdarlamasyn júzege asyrý barysynda Astana qalasy boıynsha belgili bir nátıjelerge qol jetkizildi. 2013 jyldyń 6 aıynda 2012 jyldyń sáıkes merzimimen salystyrǵanda maqsatty kórsetkishter aıtarlyqtaı jaqsarǵan. Atap aıtqanda, týberkýlezge shaldyǵý oqıǵalary 100 000 adamǵa shaqqanda 116,7-den 98,4-ke deıin, ıaǵnı 15,6%-ǵa azaıdy. Qurt aýrýynan ólim-jitim kórsetkishi 100 000 adamǵa shaqqanda 6,1-den 4,1-ge deıin nemese 32,7%-ǵa kemidi», - dep habarlady vedomstvo.
Sonymen qatar, qaterli isikten kóz jumý oqıǵalary 12,1%-ǵa, qan aınalymy júıeleri aýrýlary boıynsha bul kórsetkish 2,3%- ǵa tómendedi.
Astanada sońǵy jarty jyldyń ishinde sábı ólimi kórsetkishi de 100 000 adamǵa shaqqanda 10,8-den 9,2-ge deıin, ıaǵnı 14,8%-ǵa azaıdy.
Tutastaı alǵanda, 2013 jyldyń birinshi jartyjyldyǵynda 417 926 adam aýrýdy erte anyqtaıtyn skrınıngtik zertteýmen qamtyldy, 5379 patologııalyq jaǵdaı, 10 sút beziniń qaterli isigi, 2 asqazan obyry men kolorektaldy obyr, 1 jatyr moıny obyry jáne óńeshtiń qaterli isigi jaǵdaıy tirkeldi.
Densaýlyq saqtaý basqarmasynyń habarlaýynsha, barlyq jaǵdaılar boıynsha anyqtalǵan aýrýlardy dıspanserleý jáne emdeý boıynsha sharalar ýaqtyly qabyldandy.
