Astanada birinshi synyp oqýshysynyń qaltasyndaǵy uıaly telefon jaryldy
ASTANA. QazAqparat - Astanalyq birinshi synyp oqýshysynyń uıaly telefony jaryldy. Oqýshy qyz úshinshi dárejeli kúıikpen eseńgiregen jaǵdaıda aýrýhanaǵa jetkizildi, dep habarlady nur.kz.
Astanada jeti jasar Arıana Aıtjan qaltasyndaǵy «Samsung Galaxy S2» telefonynyń jarylýynan kúıik jaraqatyn aldy.
«Qyzym aýlada oınap júrgen. Men qasynda bolǵan joqpyn, - dep áńgimeledi zardap shekken birinshi synyp oqýshysynyń ákesi Erlan Aıtjan. - Maǵan kórshilerimniń aıtýynsha, birdeńe tars ete túskende, qyzym qoryqqannan aıqaılap jibergen, sol mezette djınsı shalbary jana bastaǵan. Qyz bala aıqaılap, kómekke shaqyrǵan. Kórshiler onyń janyp jatqan djınsıin sheship alǵanda, terisi birge sypyrylyp túsken. Kúıik súıekke deıin jetken», - dedi Erlan Aıtjan agenttik tilshisine.
Arıananyń ákesiniń aıtýynsha, qyzyn úshinshi dárejeli kúıik shalǵan, qazir onyń terisin jamaý otasyna ázirleýde.
«Biz qazir aýrýhanada jatyrmyz, sirá, biraz bolatyn túrimiz bar. Terisin jamaý kerek. Qyzym qazir telefonnan qorqatyn boldy. Men Samsung kompanııasyna telefon shaldym, olar bárin ótep, emdeý shyǵyndaryn tóleýge ýáde berdi», -dedi qyzdyń anasy Álııa Qamzına.
Qazir zardap shekken qyzdyń ata-analary qyzdarynyń densaýlyǵymen aınalysýda; keıinnen olar Arıanaǵa zardap shektirgen kinálilerdi jazalaýǵa nıetti.
«Samsung Galaxy S2» telefonyn Astanadaǵy Respýblıka dańǵylyndaǵy dúkennen satyp aldyq. Qazir biz telefondy táýelsiz saraptamaǵa bermekpiz. Keshe Máskeýdegi «Samsung-ortalyǵyna» hat jazdym, olar telefondy jiberýdi surady. Biz ázirge ony jibermeımiz, aldymen táýelsiz saraptama ótkizemiz. Qazir biz qyzymyzdyń densaýlyq jaǵdaıymen aınalysýdamyz, biraq ta keıin mindetti túrde máseleniń mán-jaıyn túpteıtin bolamyz», - dep atap ótti Erlan Aıtjan.
Qyzdyń ákesi Arıana tap bolǵan oqıǵany jurtshylyqqa keńinen jarııalaıtyn nıetin bildirdi.
