Astanada birinshi synyp baǵdarlamasyna aǵylshyn tili engizildi
ASTANA. 20 tamyz. QazAqparat - Astanada aǵylshyn tili birinshi synyptan bastap negizgi mektep baǵdarlamasyna engiziledi. Bul týraly QR BǴM jaýapty hatshysy Álııa Ǵalymovaǵa silteme jasap astana.kz málimdedi.
«Bilim berýdi damytý memlekettik baǵdarlamasy sátti júrgizilip jatyr. Bıyl qyrkúıek aıynan bastap bilim salasynda birinshi synyptarda aǵylshyn tilin engizý boıynsha pılottyq joba qolǵa alynady», - dedi tamyz konferentsııasy barysynda Qazaqstan Respýblıkasy Bilim jáne ǵylym mınıstrliginiń Jaýapty hatshysy Álııa Ǵalymova.
Qala ákimi Imanǵalı Tasmaǵambetov óz kezeginde, oqý barysynda ınnovatsııalyq tehnologııalardy paıdalaný úshin mektep oqýshylary shyǵarmashylyq oılaý daǵdylaryn damytýy tıis ekenin atap ótti.
«Shyǵarmashylyq oılaý daǵdysy bolmasa, zamanaýı tehnologııalar jasaý múmkin emes. Bala durys oılap, saraptaı bilýi kerek. Olar aqparatty derekterden aıyra bilýi tıis, al ony mektepte beriletin bazalyq bilim ǵana úırete alady», - dedi ol.
Sonymen qatar, qala basshysy qazaq tilin oqytýdy damytý qajet ekenin atap ótti.
«Qazirgi ýaqytta qazaq tilindegi mektepter, gazet-kitaptar, telebaǵdarlamalar kóp, biraq tildi damytý úshin keń aýdıtorııa kerek. Qazaq tilin oqytý ádistemesin ázirleý kerek», - dedi elorda ákimi Imanǵalı Tasmaǵambetov.
