Astanada birinshi muǵalimder forýmy ótti (FOTO)
ASTANA. QazAqparat - Astananyń Oqýshylar saraıynda Muǵalimder kúni qarsańyna birinshi muǵalimder forýmy ótti. Sharaǵa elordanyń 400-ge jýyq ustazy, astanalyq bilim berý mekemeleriniń, Bilim basqarmasynyń mamandary, jergilikti atqarýshy organdarynyń ókilderi qatysty.
Bul týraly Astana ákiminiń baspasóz qyzmetinen habarlady.
Astana qalasy Bilim basqarmasysynyń basshysy Elmıra Sýhanberdıeva atalmysh shara QR Bilim jáne ǵylym mınıstrligi jáne Astana qalasy ákimdiginiń qoldaýymen ótip jatqanyn aıtty. Onyń aıtýynsha, Qazaqstannyń árbir qalasynda 21-30 qyrkúıek aralyǵynda Muǵalimder kúni qarsańynda osyndaı forýmdar ótedi.
Búgin «Altyn belgi» ıegerlerin jáne halyqaralyq olımpıadalar men ǵylymı jobalar saıystarynyń jeńimpazdaryn daıyndaǵan 130 ustaz qurmet gramotalarmen marapattalady.
Atap ótý kerek, 2015 jyly Astana qalasynyń 200-ge jýyq oqýshysy halyqaralyq olımpıadalar jeńimpazdary atandy. Astanalyq komanda respýblıka boıynsha qatarynan 9 jyl «Úzdik komanda» retinde atalyp ótti. UBT nátıjesi boıynsha Astana birinshi orynda.
Eske sala keteıik, Astana qalasynda jalpy bilim beretin 91 mektepte 7 myńǵa jýyq muǵalim jumys isteıdi, onyń ishinde biliktiligi joǵary jáne birinshi sanatty mamandar 55% quraıdy.
