Astanada bireýdiń telefonyn alyp qashý faktileri kóbeıgen
ASTANA. QazAqparat - Astana polıtsııasy uıaly telefondardy urlaýǵa qatysty alaıaqtyqtyń jıilep ketkenin alǵa tartty, dep habarlaıdy QazAqparat vedomstvonyń baspasóz qyzmetine silteme jasap.
Osyǵan baılanysty, astanalyq polıtsııa qyzmetkerleri azamattardy barynsha saq bolyp, jeke zattaryna muqııat qaraýǵa shaqyrady.
«Shuǵyl qońyraý shalý» týraly ótinish jasaý - alaıaqtyq tásilderdiń ishinde keń taraǵan túri. Osyndaı jaǵdaı boıynsha qalanyń úsh turǵyny aryzdanǵan. Aryzdanýshylardyń aıtýynsha, belgisiz bireýler kóshede «telefonyńyzdy bere turyńyzshy, qońyraý shalyp alaıyn» dep ótinish jasaǵan. Sosyn uıaly telefondy ala salysymen belgisiz baǵytqa qashyp ketken» delingen habarlamada.
Mysaly, bir azamattan Birjan sal kóshesinde beıtanys er adam uıaly telefonyn suraǵan. Qolyna telefondy alǵan sátte álgi adam taıyp turǵan. Jedel izdestirý sharalary kezinde polıtseıler kúdiktini ustady. Alaıaqtyq faktisi boıynsha sotqa deıingi tergep-tekserý júrgizilip jatyr. Uıaly telefon ıesine qaıtaryldy.
«Sizden bireý telefonyńyzdy surasa, barynsha muqııat bolyńyz. Ótip bara jatqan adamǵa kómekteskińiz kelse, telefondy beıtanys adamnyń qolyna bermeı, nómirdi ózińiz terińiz. Alaıaqtardan saq bolyńyz» dep eskertedi Astana polıtsııasy.
Zańsyz áreketterge tap bolǵanda nemese kýá bolǵan jaǵdaıda tez arada Astana qalalyq polıtsııasyna júginińiz nemese 8 (7172) 71-65-50, 102 telefondaryna qońyraý shalyńyz.
