Astanada bireýdiń páterin jalǵa berip kelgen alaıaqtar ustaldy
ASTANA. QazAqparat - Astanalyqtarǵa páterdi jalǵa berý kezindegi alaıaqtyq jaǵdaılar týraly eskertildi, dep habarlaıdy QazAqparat.
Astana polıtsııa departamentiniń aqparaty boıynsha, polıtsııa qyzmetkerleri páterlerdi zańsyz berip kelgen 20 jastaǵy Qaraǵandy oblysynyń turǵynyn ustady.
«Qaraǵandy oblysynyń týmasy Astanaǵa kelip, páterdi táýlik boıynsha jaldaǵan. Keıin ony uzaq merzimge jalǵa bergen. Orta eseppen ol ár páterden alaıaqtyq jolmen 100 myń teńge alyp kelgen. Áıel elordanyń túrli aýdandarynda baspanalardy jalǵa berý boıynsha 9 alaıaqtyq is jasady degen kúdikke ilindi», - delingen habarlamada. 
Budan bólek, polıtseıler 35 jastaǵy elorda turǵynyn ustady. Ol azamattardyń qarajattaryn alaıaqtyq jolmen ıelenip, óz páterindegi bólmeni jalǵa berýge ýáde etken. Budan buryn ol QR QK «alaıaqtyq» baby boıynsha qylmystyq jaýapqa tartylǵan.
Qazirgi tańda sotqa deıingi tergeý jumystary júrip jatyr. Onyń basqa da qylmystarǵa qatysynyń bar-joǵy anyqtalýda.
