Astanada bir jylda 50-den astam bala ıis tıip ýlanyp qalǵan
ASTANA. 23 qańtar. QazAqparat - 2013 jyly Astana qalasynyń №2 qalalyq balalar aýrýhanasyna ıis tıip ýlanyp qalǵan 53 bala jatqyzyldy. Bul týraly astana.kz saıtyna qalalyq Densaýlyq saqtaý basqarmasynan habarlady.
Jyl saıyn qys kezinde ot jaǵý maýsymynyń bastalýymen tunshyqtyrǵysh gazdan ýlaný oqıǵalarynyń sany artady. 2012 jyly elordada túrli dárejede ıis tıip ýlanǵan 81 bala, 2013 jyly 53 bala aýrýhanaǵa jatqyzylǵan. «Tunshyqtyrǵysh gazdan ýlaný jaǵdaılary tómendegenimen, ata-analar saqtyq sharalary týraly umytpaý kerek. Kóbinese balalardyń ıis tıip ýlanýy eresekterdiń turmystaǵy nemquraılylyǵy men peshpen ot jaǵý júıesindegi olqylyqtardy ýaqytyly jóndemeýi saldarynan oryn alyp jatady»,- delingen vedomstvo habarlamasynda. Tunshyqtyrǵysh gazdan ýlaný - jiti patologııalyq jaǵdaı, ol tunshyqtyrǵysh gazdyń adam aǵzasyna enýi nátıjesinde paıda bolady, adam ómiri men densaýlyǵyna qaýipti bolyp tabylady jáne bilikti medıtsınalyq kómeksiz mundaı jaǵdaı adam ólimimen aıaqtalýy múmkin. Aıta keteıik, adam jeńil dárejede ýlanǵanda bas aýrýy, shekeniń solqyldaýy, bas aınalý, keýde tusynyń aýrýy, qurǵaq jótel, jas aǵý, júrek aıný, qusý, kózine elesteýi múmkin, teriniń qyzarýy, kózdiń shymqaı qyzyl túske boıalýy, tahıkardııa, qan qysymynyń artýy oryn alady. Osyndaı jaǵdaıǵa tap bolǵandar zardap shekken adamdy tunshyqtyrǵysh gaz jaılaǵan orynnan shyǵaryp, jedel járdem brıgadasyn shaqyrýy tıis, deıdi medıtsına qyzmetkerleri.
