Astanada bir túnde 17 myń tekshe metrden astam qar shyǵaryldy
NUR-SULTAN. QazAqparat - Elordada bir túnde 17 myń tekshe metrden astam qar shyǵaryldy, dep habarlaıdy QazAqparat qala ákimdigine silteme jasap.
Osy ýaqytta Nur-Sultanda qar kúreý jumystaryna 900-den astam arnaıy tehnıka men 2 myńǵa jýyq adam jumyldyrylǵan.
«Qańtardyń 14-inen 15-ine qaraǵan túni 17 313 tekshe metr qar shyǵaryldy. Birinshi kezekte, ereje boıynsha joldarda keptelis bolmaý úshin qozǵalysy óte qarqyndy ýchaskeler tazartylady. Odan ári ortasha qarqyndy ýchaskeler – alańdar, vokzal mańyndaǵy aýmaqtarǵa kóńil bólinedi», - dedi ákimdikten.
Jınalǵan qar elordanyń ár aýmaǵynda ornalasqan 11 polıgonǵa shyǵarylady. Kóshelerdi qardan tazartý 24/7 rejıminde júrgiziledi. Polıgondarda baqylaý úshin foto-jáne beınekameralar ornatylǵan.
