Astanada bir top avtomobıl urysy qamaýǵa alyndy
ASTANA. QazAqparat - Polıtsııa elorda turǵyndary men qonaqtaryna avtomashına salonynda qundy zattary men aqshalaryn qaldyrmaýdy eskertedi. Óıtkeni urylar olardy avtomobıl esigin túrli amaldarmen ashý nemese terezesin syndyrý arqyly alyp ketýi múmkin. Bul jaıly «QazAqparat» HAA Astana ІІD baspasóz qyzmetiniń basshysy Sofııa Kolyshbekovanyń Feısbýktegi paraqshasyna silteme jasap habarlaıdy.
«11 qazanda Astana ІІD qylmystyq polıtsııasynyń qyzmetkerleri birneshe ret avtomashına salondaryn tonap ketken qylmystyq topty ustady. Olar 27-den 32 jasqa deıingi elorda turǵyndary, onyń ekeýi buryn urlyq jasaǵany úshin sottalǵan. Qazaqstan Respýblıkasy Qylmystyq kodeksiniń «Urlyq» baby boıynsha sotqa deıingi tergeý amaldary júrip jatyr. Kúdiktiler ІІD ýaqytsha ustaý oqshaýlaǵyshyna jiberildi. Olardyń qala aýmaǵyndaǵy osyǵan uqsas buryn ashylmaǵan qylmystarǵa qatysy bar-joǵy tekserilýde», - dep jazdy Sofııa Kolyshbekova.
Qala ІІD baspasóz qyzmetindegilerdiń aıtýynsha, qaskúnemder balabaqshalardyń, saýda jáne oıyn-saýyq ortalyqtarynyń, bazarlardyń aldynda turǵan avtomashınalardyń salonyna «kodgraberdi» paıdalaný arqyly kirgen. Telefondaryn, qundy zattary men aqshalaryn kólikte qaldyrǵan azamattar olardyń qurbany bolǵan.
