Astanada bir táýlik ishinde kóktaıǵaqtan 250-den astam adam zardap shekken
ASTANA. QazAqparat - Bir táýliktiń ishinde elordalyq travmatologııalyq pýnktterde 250-den astam adam qaraldy, dep habarlaıdy elorda ákiminiń resmı saıty.
Astanada kóktaıǵaqqa baılanysty daýyldy eskertý jarııalandy. Qalalyq kommýnaldyq qyzmetter joldardy qatyp qalǵan muzdan tazartýda. Osy kúnge deıin qala boıynsha 305 m3 qum-tuz qospasy tóseldi. Qazirgi kezde qala boıynsha qar jınaý jumystaryna 2260 jumysshy, onyń ishinde «Almaty» aýdanynda - 1171, «Esil» aýdanynda - 491 jáne «Saryarqa» aýdanynda - 598 jumysshy tartyldy. Qala boıynsha 37 qum sebetin, 87 trotýar jınaýǵa arnalǵan mashına, jalpy kóshelerdi jınaýǵa 700 kommýnaldyq tehnıka birligi jumyldyryldy.
Tabıǵat jaǵdaıyna qaramastan, elordada medıtsınalyq pýnktterge júgingender sany aıtarlyqtaı ósken joq, aıaq-qoldyń syný jáne shyǵyp ketý jaǵdaılary jıi kezdesedi.
Astana qalasy Densaýlyq saqtaý basqarmasynyń málimetteri boıynsha, táýlik ishinde 252 adam dárigerlerdiń kómegine júgingen, sonyń ishinde 126-sy kóshede qulap, jaraqat alǵan. Turmystyq jaraqat alǵandar sany - 44, aıaq-qoly synyp, shyǵyp, býyn taıyp ketkenderdiń jáne t.b. sany - 65.
Elordalyq medıtsınalyq mekemeler zardap shekkenderdi qabyldaýdy jalǵastyrýda. Dárigerler qala turǵyndaryn abaı bolýǵa jáne jol júrý erejesin saqtaýǵa shaqyrady.
- Jaraqat alý jaǵdaılar sany aıtarlyqtaı ósken joq. Barlyǵy qalypty norma sheginde. Eń aldymen, adamdar jaıly aıaq kıim kııýi tıis, boıjetkenderdiń bıik óksheli aıaq kıimderden bas tartqany abzal. Jaıaý júrginshiler joldan ótkende jol júrý erejesin buzbaýy kerek, óıtkeni kóktaıǵaqta mashınalardyń tejegishteri birden iske qosyla bermeıdi. Jaraqattyń, aıaq-qoldyń synýy, shyǵyp ketýi baıqalǵan sátte birden travmotologııalyq pýnktterge barý qajet,- deıdi Densaýlyq saqtaý basqarmasy basshysynyń emdeý-profılaktıkalyq jumystary jónindegi orynbasary Ivan Lı.
Buryn habarlanǵanyndaı, elordada kóktaıǵaqqa baılanysty birinshi aýysymdaǵy 1-4 synyptar úshin sabaq bolǵan joq.
