Astanada bir otbasyndaǵy 5 adam tamaqtan ýlandy
ASTANA. QazAqparat - Astana qalalyq qoǵamdyq densaýlyq saqtaý departamentiniń basshysy Sadýaqas Baıǵabylov úıde tamaqtan ýlanýdyń jekelegen oqıǵalaryna qatysty pikir bildirdi, dep habarlaıdy QazAqparat tilshisi.
Onyń aıtýynsha, qazirgi ýaqytta qoǵamdyq tamaqtaný oryndarynda ǵana emes úıde daıyndalǵan tamaqtan da ýlanyp qalý oqıǵalary oryn alyp jatyr. Ásirese, mereke kúnderi qajetti azyq-túlik der ýaqytynda satyp alynyp, túrli taǵam, salat, kondıterlik táttiler daıyndalady.
«Meıram kúnderi úıde daıyndalǵan tamaqtan ýlanýdyń negizgi sebebi jeke gıgıena erejelerin saqtamaý, daıyndaý tehnologııasyn, temperatýra, saqtaý rejimin buzý sanalady. Máselen, 8 naýryz Halyqaralyq áıelder merekesi qarsańynda juqpaly aýrýlar aýrýhanasyna bir otbasyndaǵy 5 adam ishek ınfektsııasymen tústi. Eń kishisi - 13 jasta. Ýlaný sebebi - qaımaq tuzdyǵyna buqtyrylyp pisirilgen et pen sańyraýqulaq. Tamaqtyń quramyna as daıyndaǵanǵa deıin 20 kún buryn ashylǵan qalbyrdaǵy tuzdalǵan sańyraýqulaq pen jaramdylyq merzimi ótken qaımaq qosylǵan. Tamaq qaldyǵyna júrgizilgen zerthanalyq saraptama barysynda qozyquıryq sańyraýqulaǵy men qaımaqtan ishek taıaqshalary tabylǵan», - dedi ol.
Departament basshysy dereginshe, 2018 jyly elorda turǵyndary arasynda ótkir ishek ınfektsııasyna shaldyǵýdyń 1230 oqıǵasy tirkelgen. Onyń ishinde 14 jasqa tolmaǵan 734 bala aýyrǵan.
«144 oqıǵada aýrýǵa úıde daıyndalǵan sapasyz ónim, 137 oqıǵaǵa jýylmaǵan jemis-jıdek pen kókónis jáne 84 oqıǵaǵa jeke gıgıena erejelerin saqtamaý sebep bolǵan», - dedi Sadýaqas Baıǵabylov.
