Astanada bir otbasy túgel ýlandy
ASTANA. QazAqparat - Astanada adamdardyń jappaı ýlanǵany anyqtaldy, dep habarlaıdy QazAqparat.
Elordadaǵy juqpaly aýrýlar aýrýhanasynda qazir úsh eresek adam, balalar aýrýhanasynda eki bala men anasy Salmonallez aýrýyna qarsy em alyp jatyr. Ýlanǵan taǵy úsh adam emderin aıaqtap, úılerine ketken. Zardap shegýshi Qazbek Ibraevtyń aıtýynsha, 9 qazan kúni eki balasy men áıelin ertip Ǵ.Músirepov kóshesiniń boıyndaǵy «Dostar-1» turǵyn úı kesheninde ornalasqan «Dastarqan» ashanasynan tamaqtanǵanyn aıtýda.
«Biz 9 qazan kúni ýlandyq. Tańǵy saǵat 10.20 shamasynda eki balam men áıelim tórteýmiz sol jerden tamaqtandyq. «Dastarqannan» shyqqannan keıin men úıden de, syrttan da tamaq ishken joqpyn. Sol kúni keshke taman meni aýyr halde juqpaly aýrýlar aýrýhanasyna ákeldi. Bir kúnnen keıin balalarym men áıelim aýrýhanaǵa tústi. Olar balalarǵa arnalǵan juqpaly aýrýlar aýrýhanasynda. Mine, eki aptadan beri otbasym túgel aýrýhanada jatyr. Juqpaly aýrýlar aýrýhanasy bolǵan soń, bizdi syrtqa shyǵarmaıdy, eshkimdi ishke kirgizbeıdi. Sondyqtan, zardap shekkenimiz týraly aryzdy aldaǵy dúısenbi, aýrýhanadan shyqqan soń jazamyz»,-deıdi Astana turǵyny Q. Ibraev.
Qazbektiń janynda ýlanǵan taǵy eki azamat jatyr. Biri -Dinmuhamed, ekinshisi - Ashat. Áriptes eki jigittiń de aıtýynsha, olar 8 qazan kúni «Dastarqan» ashanasynan tamaqtanǵan soń jedel járdemmen aýrýhanaǵa túsipti.
«Áriptesimiz ekeýmiz 8 qazan kúni túski saǵat 13.30 shamasynda túski as ishtik. Tústen keıin jumysta basymyz aınalyp, qusyp, syrtqa júgire berdik. Keshke jaqyn áriptesim Ashatty jedel járdemmen aýrýhanaǵa áketti, men erteńinde tústim. Salmonallez taıaqshalary tabyldy. Biz memlekettik kúzet agenttiginde jumys isteımiz, sondyqtan, basqa zardap shekendermen birge zań boıynsha óz quqyǵymyzdy qorǵaımyz. Aldaǵy dúısenbi kúni aýrýhanadan shyqqan soń aldymen ashananyń basshylyǵyna talap aryz túsirip, keıin mindetti túrde quqyq qorǵaý organdaryna aryzdanamyz. sebebi, eki jáne odan da kóp adamnyń ýlanýy - qylmystyq is», - deıdi Dinmuhamed Áýelbekov.
Qazbek, Dinmuhamed pen Ashat ta Dostar-1 TK-degi «Dastarqan» ashanasynan kókónis qosylǵan et, kartop ezbesi, sańyraýqulaq jegenderin aıtyp otyr.
Aıta keteıik, atalǵan mekenjaıda ornalasqan «Dastarqan» áli de jumys istep tur.
