Astanada bir kúnde eki bala kópqabatty úıdiń terezesinen qulap ketti
NUR-SULTAN. QazAqparat – Bir kúnde astanada eki bala kópqabatty úıdiń terezesinen qulap ketti, dep habarlaıdy QazAqparat Nur-Sultan qalalyq polıtsııa departamentine silteme jasap.
5 qyrkúıek kúni saǵat 13.20-da eki jasar búldirshin asúıde ústel ústinde oınap júrip, terezege minip ketken. Anasy osy kezde sol bólmede bolǵan.
Anasynyń aıtýynsha, ol balany ustap alaıyn degen, biraq úlgermeı qalǵan.
Ol moskıt toryna bar salmaǵymen súıenip, 3 qabattan terezeden qulap ketken. Buldirshin túrli dene jaraqattarymen aýrýhanaǵa jetkizildi.
Osy kúni saǵat 15.30-da 4 jasar bala anasymen birge Rysqulbekov kóshesinde týystarynyń úıinde qonaqta bolǵan.
Bala jatyn bólmege oınaýǵa ketedi, ol bólmeniń terezesi ashyq qalǵan. Tereze aldyna shyǵyp, moskıt toryna súıengen bala 6 qabattan qulap ketken.
Keıin anasy ashyq turǵan terezeden balasynyń jerde jatqanyn kóredi. Bala jansaqtaý bólimine jetkizildi, biraq ony aman alyp qalý múmkin bolmady.
Polıtseılerdiń aıtýynsha, jyl basynan beri 31 bala kópqabatty úıdiń terezesinen qulap ketken, sonyń tórteýi kóz jumdy.
Tártip saqshylary eresekterden qaýipsizdik erejelerin qatań saqtaýdy suraıdy.
Balalardy eshbir jaǵdaıda qaraýsyz qaldyrmaı, ashyq turǵan terezeniń qasynda oınaýǵa ruqsat bermeý kerek.
Moskıt torlary qaýipsiz kóringenimen, bala oǵan súıengende salmaqty kótere almaıdy. Terezege arnaıy qulyp qondyrý nemese tutqasyn alyp tastaý qajet.
