Astanada bir aıda 40 buzaqy qamaýǵa alyndy - Joǵarǵy Sot
ASTANA. 17 mamyr. QazAqparat - Usaq buzaqylyq úshin Astanada bir aıdyń ishinde 390 adamǵa aıyppul salynyp, 40 adam ákimshilik qamaýǵa alyndy.
Bul týraly búgin Joǵary Sotta ótken baspasóz máslıhatynda vedomstvonyń resmı ókili Oksana Peters málim etti.
Onyń atap ótkenindeı, respýblıka sottaryna qoǵamdyq oryndarda bylapyt sóıleý, jeke tulǵalardy qorlap tıisý, turǵyn jaılardy qorlaý, ortaq paıdalaný oryndaryn lastaý, onyń ishinde belgilenbegen oryndarda kommýnaldyq qaldyqtardy shyǵarý, qoǵamdyq tártipti jáne jeke tulǵalardyń tynyshtyǵyn buzýmen baılanysty is-áreketter boıynsha hattamalar basym túsýde.
«Sizder bilesizder, qazir elimiz boıynsha tazalyq úshin kúres jumystary qarqyndy túrde júrgizilip keledi. Máselen, bir aıdyń ishinde Astana qalasy mamandandyrylǵan aýdanarlyq ákimshilik sotymen usaq buzaqylyqqa qatysty 438 is qaralǵan. Atalǵan quqyq buzýshylyq boıynsha 390 tulǵaǵa aıyppul salynsa, 40 adam ákimshilik qamaýǵa alynǵan», - dedi O. Peters.
Usaq buzaqylyq úshten onǵa deıingi aılyq eseptik kórsetkish mólsherinde aıyppulǵa nemese on táýlikke deıin ákimshilik qamaýǵa alýǵa ákelip soǵady. Eskerte ketetin jaıt, bir jyl ishinde buzaqylyq qaıtalanatyn bolsa, quqyq buzýshy on bes táýlikke deıingi merzimge ákimshilik qamaýǵa alynady.
