Astanada bir aptada eki júkti áıel kóz jumdy
ASTANA. QazAqparat - Astanada taǵy eki júkti áıel qaza tapty, dep habarlaıdy QazAqparat Elorda Info agenttigine silteme jasap. Eki áıeldiń bireýi 31 qazanda úıinde, al ekinshisi 4 qarashada aýrýhanada kóz jumǵan.
«Sońǵy kúnderi eki júkti áıel mezgilsiz qaıtys boldy. Birinshisi - aıy-kúni jaqyndaǵan 1986 jyly týǵan áıel. Ol óz úıinde kóz jumdy. Máıitti soıyp, sot saraptamasyn júrgizý kezinde marqumnyń tiri kezinde baıqalmaǵan týa bitken bas mı-qan tamyrlarynyń patologııasy bary anyqtaldy. Ekinshi jaǵdaı boıynsha, 1980 jyly týǵan áıel bizge ólim aýzynda tústi», - dedi Astana qalasynyń qoǵamdyq densaýlyq saqtaý basqarmasy basshysynyń orynbasary Álııa Rústemova qalalyq ákimdikte ótken brıfıngte.
Onyń aıtýynsha, medıtsınalyq kómek tolyq kólemde kórsetildi.
«Ókinishke qaraı, biz qudaı emespiz, kórsetilgen barlyq reanımatsııalyq kómekke qaramastan, ol áıel kóz jumdy. Júktilik josparlanbaǵan, turmysta bolmaǵandyqtan qalaýsyz bolǵan degen aqparat bar. Áıel bir de bir emhanaǵa tirkelmegen, júktilik boıynsha esepte bolmaǵan, medıtsınalyq uıymǵa kelmegen. Ol bir týysynyń úıinde tirkeýde bolǵan, biraq atalǵan mekenjaıda turmaǵan. Únemi túrli mekenjaı boıynsha páter jaldap kelgen», - dedi ol.
Ekinshi jaǵdaı boıynsha sot-medıtsına saraptamasy júrip jatyr. Onyń nátıjeleri sońǵy túpkilikti tekserýden keıin jarııalanady. Dárigerler qazir polıtseıler tergeý júrgizip jatqanyn aıtty.
«Eki oqıǵada da náresteler kóz jumdy. Aýrýhanaǵa ólim aýzynda túsken áıel úsh kún boıy úıinde jatyp, aýyrsynýdy basatyn jáne júktilikti toqtatyn dári-dármekti ýystap ishken. Bala úıinde júrgende qaıtys bolyp, áıeldiń jatyrynda jaıyla bastaǵan. Ol áıeldiń aǵzasyna bitip ketip, nátıjesinde aýrýhanaǵa óte aýyr jaǵdaıda tústi», - dedi Astana qalasynyń qoǵamdyq densaýlyq saqtaý basqarmasynyń shtattan tys akýsher-gınekology Ivan Korkan.
Onyń aıtýynsha, ekinshi kóz jumǵan áıeldiń artynda eki balasy men jumyssyz kúıeýi qalǵan.
Esterińizge sala keteıik, Astanada 21 maýsymda №1 perınataldyq ortalyqta bosanǵan áıel qaza tapqan bolatyn. Al ekinshi oqıǵa 25 maýsymda oryn aldy. 2 shildede ortalyqta taǵy bir áıel kóz jumdy. 16 shildede № 2 perınataldyq ortalyqta bosanǵan áıel qaıtys boldy. 1 qyrkúıekte besinshi ana ólimi tirkeldi.
