Astanada bir apta ishinde 3 balany kólik qaǵyp ketken
NUR-SULTAN. QazAqparat – Jyl basynan beri elordada kámelet jasyna tolmaǵandar apatqa ushyraǵan 38 jol kólik oqıǵasy bolǵan. Bir bala kóz jumǵan. Bir apta ishinde Nur-Sultan qalasynda 3 balany qaǵyp ketken, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.
Bıylǵy jyldyń 21 shildesinde saǵat 21:00-de «Toyota» markaly avtokóliktiń júrgizýshisi Bógenbaı batyr dańǵylymen kele jatyp velosıped aıdap kele jatqan 8 jasar jetkinshekti qaǵyp ketken.
22 shildede saǵat 12:00 shamasynda «Mercedes» markaly avtokóliktiń júrgizýshisi B.Momyshuly dańǵylymen kele jatyp, baǵdarshamnyń tyıym salynǵan túsin elemeı júrip ketip, belgilengen jerden ótip bara jatqan 12 jasar jaıaý júrginshini qaǵyp ketti.
Sol kúni saǵat 17:00 shamasynda «Lada» markaly kólikti tizgindegen júrgizýshi Konstıtýtsııa kóshesinen K.Baıseıitova kóshesine qaraı kele jatyp, belgilengen jerden ótip bara jatqan 12 jastaǵy jasóspirimdi qaǵyp ketti.
Jol apaty saldarynan balalar dene jaraqatyn alyp, qalalyq balalar aýrýhanasyna jetkizildi.
Atalǵan barlyq fakti boıynsha tergeý amaldary júrgizilip jatyr.
