Astanada byltyr 57 notarıýstyń lıtsenzııasy toqtatyldy
ASTANA. KAZINFORM — Elordada zań kómeginiń sapasyn arttyrý maqsatynda júrgizilgen baqylaý sharalary nátıjesinde 2025 jyly ondaǵan notarıýs pen advokatqa tártiptik jaza qoldanylyp, keıbiri lıtsenzııasynan aıyryldy. Bul týraly Astana qalasynyń ákimdigi málim etti.
Astana qalasy Ádilet departamenti basshysynyń orynbasary Baqytjan Beısen 2025 jyly zań qyzmetterin kórsetý salasynda atqarylǵan jumystardyń qorytyndysyn jarııalady.
Onyń aıtýynsha, búginde elordada notarıattyq qyzmetti 892 notarıýs júzege asyryp otyr.
— Byltyr departament tarapynan lıtsenzııanyń qoldanysyn toqtata turý týraly 57 usynys engizildi. Onyń ishinde 40 notarıýs lıtsenzııasyn óz qalaýy boıynsha toqtatsa, 13-i departamenttiń usynysymen, 4-eýi Astana qalasy notarıattyq palatasynyń usynysy negizinde toqtatyldy, — deıdi ol.
Spıkerdiń sózinshe, notarıattyq is-áreketterdiń zańdylyǵy men is júrgizý talaptarynyń saqtalýyna qatysty 85 tekserý júrgizilgen. Onyń 67-si jospardan tys, 18-i profılaktıkalyq baqylaý aıasynda uıymdastyrylǵan.
— Jospardan tys tekserýler nátıjesinde 23 notarıýs tártiptik jaýapkershilikke tartyldy. Onyń ishinde 14 eskertý, 3 sógis, 1 qatań sógis jarııalandy, 5 notarıýstyń lıtsenzııasynyń qoldanysy ýaqytsha toqtatyldy. Qalǵan materıaldardyń bir bóligi áli qaralyp jatyr, — dep naqtylady Baqytjan Beısen.
Profılaktıkalyq baqylaý qorytyndysy boıynsha 14 nusqama shyǵarylyp, bir notarıýstyń lıtsenzııasy toqtatylyp, bireýi lıtsenzııasynan aıyrylǵan. Sonymen qatar, 18 notarıýs ákimshilik jaýapkershilikke tartylǵan.
— Ádilet organdary týraly» zań talaptaryna sáıkes, advokattar, notarıýstar, jeke sot oryndaýshylary men zań konsýltanttary kórsetetin zań kómeginiń sapasyn baqylaý — ádilet organdarynyń mindeti. Osy oraıda 2025 jyly departament tarapynan lıtsenzııasynan aıyrý týraly 4 talap aryz sotqa joldandy. Onyń bireýi boıynsha notarıýs lıtsenzııasynan aıyryldy, qalǵany sotta qaralýda, — deıdi departament basshysynyń orynbasary.
Onyń aıtýynsha, talap aryzdardyń negizgi sebepteri — notarıýs kómekshisiniń zańsyz notarıattyq áreket jasaýy, elektrondyq tsıfrlyq qoltańbany úshinshi tulǵalarǵa berý, sottyń jeke uıǵarymdary men atqarýshylyq jazba shyǵarý kezindegi zań buzýshylyqtar.
Advokattarǵa qatysty derekterge de toqtalǵan spıker elordada 857 advokat tirkelgenin aıtty.
— Esepti kezeńde 7 advokat tártiptik jaýapkershilikke tartyldy. Tórteýine eskertý, úsheýine sógis jarııalandy. Ártúrli negizdermen bir lıtsenzııa toqtatylyp, 48 lıtsenzııanyń qoldanysy ýaqytsha toqtatyldy, bir advokat lıtsenzııasynan aıyryldy, — dedi ol.
Sonymen qatar, Astanada 3 287 zań konsýltanty qyzmet atqarady. 2025 jyly olardyń 10-y tártiptik jaýapkershilikke tartylyp, bir zań konsýltanty palata músheliginen shyǵarylǵan.
Memleket kepildik bergen zań kómegi máselesine toqtalǵan Baqytjan Beısenniń aıtýynsha, departament 199 advokatpen jáne 74 zań konsýltantymen tegin zań kómegin kórsetý týraly kelisimshart jasaǵan.
— Zańda kózdelgen jaǵdaılarda tegin zań kómegi kórsetilgen azamattardyń sany — 16 862, — deıdi ol.
Sóz sońynda spıker departamenttiń 2026 jylǵa arnalǵan negizgi mindetterin atap ótti.
— Aldaǵy kezeńde azamattardyń quqyqtyq sanasy men mádenıetin arttyrý, zań kómegin uıymdastyrý jáne quqyqtyq bilim berý salasyndaǵy memlekettik saıasatty tıimdi júzege asyrý, sondaı-aq advokattar, notarıýstar men zań konsýltanttary kórsetetin zań kómeginiń sapasyn baqylaý basty basymdyq bolyp qala beredi, — dep túıindedi Baqytjan Beısen.
Elimizde notarıýs qyzmeti qansha turatynyn bilgińiz kelse, myna siltemege ótińiz.