Astanada Bilim saıabaǵy ashyldy (FOTO)
ASTANA. QazAqparat - «Bilim berý mazmunyn jańartý: bolashaq baǵdary» taqyrybyndaǵy kórme Astana qalasy ustazdar qaýymynyń tamyz keńesine arnalyp otyr.
Qala turǵyndary Kongress-holl saraıynda ótip jatqan kórme arqyly elordanyń bilim berýdegi jańashyl materıaldarmen, daryndy balalardyń jetistikterimen, bilim berý mekemeleriniń úzdik ınnovatsııalyq jobalarymen tanysa aldy, dep habarlaıdy astana.kz. - Búgingi kórmeniń basty maqsaty - engizilip jatqan ınnovatsııalyq-aqparattyq tehnologııalardy keńinen tanystyrý, qalanyń bilim berý mekemeleriniń jetistikterin kórsetý, sonymen qatar bilim berý qyzmetiniń sapasyn arttyrý boıynsha tájirıbe almasý, - dedi «Astana daryny» ortalyǵynyń ıntellektýaldy jarystar zerthanasynyń ádistemeshisi Nurjamal Saǵyrova. Kórme aıasynda uıymdastyrylǵan Bilim saıabaǵy «Bolashaqqa baǵdarlaný» teorııalyq alleıasy men «Nurly jol» praktıkalyq alleıasyna bólingen. Teorııalyq alleıa kelesi taqyryptar qamtıdy: «Bilim berý mazmunyn jańartý bilim sapasyn arttyrýdyń sharty retinde», «Sapaly jáne tabysty oqytýdyń jańa ádisteri», «Dýaldy oqytý», «Tabysty mektepter qupııasy», «Kóptildilik - ult bolashaǵy». «Nurly jol» alleıasynda Qazaq handyǵynyń 550 jyldyǵy aıasyndaǵy ıntellektýaldy saıystyń teatrlandyrylǵan qoıylymdary men ınteraktıvti saıabaqtyń robototehnıkasynyń tanystyrylymyn, kitap kórmesin tamashalaýǵa bolady. Eske sala keteıik, tamyzdyń 20 kúni Kongress-holl saraıynda saǵat 11:00-de ustazdardyń jyl saıynǵy tamyz konferentsııasy ótedi.
