Astanada «Bilim metsenattary-2012» jeńimpazdaryn marapattaý saltanaty ótedi
ASTANA. 25 qazan. QazAqparat - 26 qazanda Astanadaǵy «Qazaqstan» ortalyq kontsert zalynda «Bilim metsenattary-2012» bilim salasy metsenattaryn qoshemetteý saltanaty ótedi. Bul týraly QR Bilim jáne ǵylym mınıstrliginiń baspasóz qyzmeti habarlady.
Elimiz táýelsizdiginiń 20 jyldyǵy kezeńinde kóptegen ıgilikti jumystar atqaryldy. Kásipkerler, uıymdar men kompanııalar kóptegen metsenattyq sharalarǵa belsene qatysýda. QR Bilim jáne ǵylym mınıstrligi 2008-2012 jyldar aralyǵynda atqarylǵan jumystarǵa monıtorıng ótkizdi. Aıtalyq, tórt jyldyń ishinde bilim uıymdary men mektep oqýshylaryna 40 mlrd. teńgeden astam kómek kórsetilgen. Bular - 5 mektep pen 7 balabaqsha qurylysy, 34 mektep pen 20 balabaqshaǵa kúrdeli jóndeý ótkizý, mektepter úshin 6 avtobýs satyp áperý, 22 mektepke qural-jabdyqtar satyp áperýge kómektesý, respýblıka boıynsha 20-dan astam mektepke oqýshylardyń oqýy men demalysy úshin qarajattar bólý sııaqty ıgi ister.
Bul sharanyń maqsaty - bilim berý júıesin damytýǵa qoǵamnyń nazaryn aýdarý, sondaı-aq qaıtarymsyz qaıyrymdylyq kórsetken adamdarǵa, uıymdar men kásiporyndarǵa rızashylyq bildirip, qoshemet kórsetý.
Saltanatqa respýblıkanyń barlyq óńirlerinen bilim berý isine udaıy kómektesip kele jatqan, talantty jetim balalar men turmysy tómen otbasylaryn shyqqan balalardyń joǵary oqý oryndaryna túsýge qol ushyn bergen metsenattar shaqyrylyp otyr.
Saltanatta «Bolashaqqa ınvestıtsııalar», «Balalyqtyń úzdik dostary», «Bolashaqqa qamqorlyq», «Qaıyrymdylyq - ómir salty», «Shyn júrekten» jáne «Qoǵamdyq tanymaldyq» atalymdary boıynsha metsenattardyń esimderi belgili bolady. Sharanyń basty sáti - olardy «Metsenattyqtyń altyn kitabyna» jazý rásimi bolmaq.
