Astanada bilim berýdegi etnopedagogıka taqyrybynda halyqaralyq konferentsııa ótýde
ASTANA. Qazannyń 19-y. QazAqparat /Jasulan Amanbaıuly/ - Astanada «Bilim berýdiń etnopedagogıkalyq negizderi: teorııa jáne tájirıbe» atty halyqaralyq ǵylymı-tájirıbelik konferentsııasy bastaldy.
Oǵan Reseıdiń Bilim berý akademııasynyń qurmetti múshesi, pedagogıka ǵylymdarynyń doktory, professor Gennadıı Volkov bastaǵan orys professorlary jáne otandyq ǵalymdar qatysýda.
Halyq pedagogıkasymen uzaq jyldar boıy aınalysyp, kóptegen ǵylymı eńbekter jazǵan chývash ǵalymy G.Volkov pedagogıkalyq ádebıetterge tuńǵysh ret «etnopedagogıka» degen uǵymdy engizgen.
Eki kúnge sozylatyn halyqaralyq basqosýdyń basty maqsaty - etnopedagogıkanyń ádisnamalyq negizderin, maqsat-mindetterin jáne halyqtyq salt-dástúrlerdi bilim berý men tárbıeleý isinde qoldanýdyń mańyzdylyǵyn aıqyndaý. Sonymen qatar qoldaný múmkindigine ıe bolǵan pedagogtardyń tájirıbe almasýyna jaǵdaı jasaý.
G.Volkovtyń aıtýynsha, etnopedagogıka ǵylymynyń negizgi materıaly - halyq pedagogıkasy, ol - halyqtyń mádenı murasy, ulttyq tálim-tárbıe quraly.
Qoǵamnyń barlyq tarıhı damý kezeńderinde halyq pedagogıkasy jaıly uǵymdy anyqtaý, ár túrli ǵylymı-pedagogıkalyq kózqarastardy qalyptastyrý problemalaryna kóptegen ǵalymdar, pedagogtar kóńil aýdaryp, qundy pikirler aıtyp, urpaq úshin baǵa jetpes ómirlik muralar qaldyrdy.
Atap aıtsaq, olar orys pedagogtary K.D.Ýshınskıı, N.K.Krýpskaıa, A.S.Makarenko, V.A.Sýhomlınskıı, V.I.Vodovozov, G.S.Vınogradov, qazaqtyń kórnekti jańashyl pedagogy Y. Altynsarın, qazaqtyń asqan aqyny, qazaq tilindegi eń alǵashqy pedagogıka oqýlyǵynyń avtory M.Jumabaev jáne taǵy basqalary.
