Astanada bilim berý uıymdarynyń jumysyn jaqsartý úshin arnaıy top jasaqtalýda
ASTANA. QazAqparat - Elordalyq bilim berý uıymdarynyń jumysyn jaqsartý úshin ata-analardan quralǵan bastamashyldar toby qurylady. Bul týraly óziniń Feısbýk paraqshasynda Astana qalalyq bilim basqarmasynyń basshysy Ánýar Janǵozın jazdy, dep habarlaıdy QazAqparat.
«Astana qalasynyń Bilim basqarmasy ata-analar qaýymdastyǵymen birlese otyryp, elordalyq bilim uıymdarynda ashyqtyqty ornatý, ata-analardyń mektep ómirine belsendi qatysý, sonymen qatar balalardyń jaǵdaıyn jaqsartýǵa baǵyttalǵan is-sharalar jıyntyǵyn iske asyrý maqsatynda ata-analardan quralǵan bastamashyldar tobyn jasaqtaý josparlaýda», - dep jazdy ol.
Á. Janǵozınniń sózine qaraǵanda, qurylǵan top mektepterdi jańa oqý jyly qarsańynda qabyldaıtyn komıssııanyń quramyna kiredi. Bul rette ǵımarattyń oqý jylyna qanshalyqty daıyn ekendigin tekserý sharalaryna qatysady. Budan bólek, top músheleri kolledjderge qujattardy qabyldaý barysynda baıqaýshy retinde qatysýǵa múmkindik alady.
«Keleshekte osy tizimdegi ata-analardyń qalalyq tamaqtaný sapasyn baqylaý komıssııasy quramyna enýi josparlanyp otyr. Osyǵan baılanysty top quramyna kirýge qyzyǵýshylyq tanytqan ata-analardan 8 707 5012474 (Whats App) nómirine 2018 jyldyń 11 tamyzyna deıin ótinishterin jiberýdi suraımyz», - dep tolyqtyrdy basqarma basshysy.
