Astanada bilim berý uıymdarynda 14 myńǵa jýyq pedagog jumys isteıdi
ASTANA. QazAqparat - Qazirgi kezde elordanyń bilim berý mekemelerinde 13 760 pedagog jumys istep jatyr, dep jazady qalalyq ákimdiktiń resmı saıtynda.
Jyl saıyn óziniń kásibı biliktiligin arttyratyn muǵalimder sany artyp keledi. Búginde qalalyq mektepterde birinshi jáne joǵary sanattaǵy 6239 pedagog eńbek etip júr, byltyr bul kórsetkish 5944 bolǵan.
Bilim salasynda qyzmet etetin jas mamandar sany jyl ótken saıyn ulǵaıyp keledi. Qazirgi kezde bul kórsetkish 15% qurap otyr. Mektepke deıingi bilim berý uıymdarynda 3661 pedagog jumys isteıdi.
Astanalyq kolledjderde 1774 ınjenerlik-pedagogıka qyzmetkeri balalarǵa sabaq beredi. Sonyń ishinde 913-i memlekettik, 861-i jeke menshikti kolledjde isteıdi. Tehnıkalyq jáne kásiptik bilim berýde kadrlar 100% jasaqtalǵan.
Kolledjderde dýaldi bilim berýge basa nazar aýdarylady. Búginde bul úrdiske 21 mamandyq boıynsha 18 kolledj ben 44 kásiporyn tartylǵan, memlekettik bilim berý tapsyrysy boıynsha oqyp jatqan 1464 stýdent qamtylǵan.
Elordalyq 9 kolledjde eksperımentaldy oqý josparlary ázirlendi, olardyń óndiristik oqytý úlesi 60% deıin, al teorııalyq - 40% deıin, 2016 jyldyń qyrkúıeginen bastap tájirıbe 10 oqý ornynda qolǵa alynbaq. Ústimizdegi jyldyń qarasha aıynda gýmanıtarlyq, medıtsınalyq kolledjderde jáne «Danalyq» medıtsınalyq-farmatsevtıkalyq kolledjde dýaldi bilim berýdi engizý kózdelgen.
