Astanada bilim berý salasynyń kóshbasshylary bas qosty
ASTANA. QazAqparat - Nazarbaev ýnıversıtetinde joǵary bilim berý salasy kóshbasshylarynyń VII Eýrazııalyq forýmy (EHELF) bastaldy. Bıylǵy forým joǵary bilim berý salasyndaǵy ınnovatsııalarǵa arnalyp otyr, dep xabarlaıdy QazAqparat tilshisi.
Forýmǵa otandyq jáne sheteldik ýnıversıtetterdiń ǵalymdary, top-menedjerler men strateg mamandar jınaldy. Olardyń ishinde Reseı, Rýmynııa, AQSh, Qyrǵyzstan, Qytaı, Avstralııa jáne taǵy basqa joǵary oqý oryndarynyń ókilderi bar. Eki kúndik májilis kezinde forým qatysýshylary ozyq texnologııalar arqyly bilim berý salasyn jańǵyrtý máselelerin talqylaıdy.
Forýmdy ashqan QR Memlekettik xatshysy Gúlshara Ábdiqalyqova bilim berý salasyndaǵy mańyzdy mindetterge toqtaldy.
«Memleket basshysynyń bıylǵy Joldaýynda adam kapıtalyn damytý máselesine basa nazar aýdarylyp otyr. Sonyń aıasynda biz ózimizdiń ozyq bilim berý júıemizdi qurýymyz qajet. Ol úshin bilim berý salasyn ınnovatsııalyq ındýstrıalızatsııaǵa beıimdep, bilimdi berip qana qoımaı, adamnyń boıynda naqty bir daǵdylardy damytqan durys. Kreatıvti oılaý qabileti bolýy qajet. Adam paıdaly aqparatty ózi taýyp, kádege jarata bilýi kerek. Sebebi qazirgi ǵylymı-texnıkalyq progress kezinde bir emes, birneshe mamandyqty aýystyrýǵa týra keledi. Soǵan daıyn bolýymyz shart. «Ómir boıy bilim alý» qaǵıdatyn ustanýymyz qajet», - dedi G.Ábdiqalyqova.
Onyń aıtýynsha, búginde Qazaqstanda Nazarbaev zııatkerlik mektepteri men Nazarbaev ýnıversıteti sııaqty bilim berýdiń satyly júıesi oń nátıje berip otyr. Sol sebepti atalǵan uıymdardyń tájirıbesi basqa mekemelerge taratylyp jatyr.
«Biz bilim berý baǵdarlamasyna ınnovatsııalardy keńinen engizýimiz kerek. Ol úshin ınfraqurylymdy jasap qana qoımaı, soǵan saı atmosferany da jasaǵan jón. Osy oraıda joǵary bilim berý kóshbasshylarynyń forýmy tıimdi joldardy usynatyn alań bolyp sanalady», - dep atap kórsetti G.Ábdixalyqova.
Forým moderatory - Nazarbaev ýnıversıtetiniń rektory Shıgeo Katsýdyń sózine qaraǵanda, eki kúndik májilis kezinde joǵary bilim salasynyń san alýan ózekti máseleleri talqylanady.
«Joǵary bilim berý salasy qalaı ózgeredi? Stýdent jastardyń daǵdylaryn damytýdyń tyń joldary qandaı? Aqparattyq zamanda tıimdi ári qolaıly ádistemeni qalaı ázirleý kerek? XXI ǵasyrda jas mamandardyń boıynda qandaı daǵdylar bolýy qajet? Tsıfrlyq texnologııalar ýnıversıtetterdiń qurylymyn qalaı ózgertedi? Árıne, osy oraıda Nazarbaev ýnıversıtetiniń tájirıbesi de keńinen zerdelenedi. Qazirgi zamanda biz barlyq ózgeristerdi baqylap otyrýymyz qajet. Skanerden ótkizgendeı bárin kórip, zaman talabyna qaraı yńǵaılana bilýimiz kerek», - deıdi Sh.Katsý.
