Astanada bilikti trenerdiń bıznesti júrgizý boıynsha semınarlary ótýde
ASTANA. QazAqparat - 23 jáne 25-26 qyrkúıekte Astanada QR Mádenıet jáne sport mınıstrliginiń qoldaýymen «Bolashaq» qaýymdastyǵy uıymdastyrǵan TMD-nyń belgili treneri Vsevolod Zelenınniń semınarlary ótip jatyr, dep habarlaıdy atalmysh qaýymdastyqtyń baspasóz qyzmetinen.
23 qyrkúıekte ótken «Bıznesti júrgizý: spıchraıtıng negizderi» semınary jumys aptasynyń tamasha bastamasy boldy. Semınar qatysýshylary PR jáne kommýnıkatsııalar salasyndaǵy mamandar, jýrnalıster, «Bolashaq» baǵdarlamasynyń stıpendıanttary, sonyń ishinde múmkindikteri shekteýli adamdar lektordy shyn yqylastarymen tyńdady. Ol kópshilik aldynda sátti sóz sóıleý úshin mátin jazý tehnıkasy týraly áńgimeledi, zamanaýı saıası tehnologııalar taqyrybyn qozǵady jáne sóz sóıleýshiniń basqa adamdarmen ózara qarym-qatynastaryn qalaısha saýatty quraýǵa bolatynyn aıtyp berdi.
«Trener Vsevolod Zelenınniń stılin erekshe atap ótkim keled. Teorııaǵa qosa ol óziniń saıası keńesshi jáne spıchraıter retindegi tájirıbesinen praktıkalyq keıster ázirledi», - dep semınar qatysýshysy Qýanysh Telaǵysov óz oıymen bólisti.
25-26 qyrkúıekte «Uıymdastyrýshylyq jáne jeke koýchıng» taqyrybyndaǵy semınar barysynda Vsevolod Zelenın toptyq jáne derbes tıimdilik týraly, ujym men jeke tulǵalardyń jumys qabilettiliginiń ózgerýine qyzmet etetin kommýnıkatsııalyq strategııalardy damytý jaıly baıandaıdy. Semınar praktıkalyq tapsyrmalardan quralǵan, munda qatysýshylar barynsha tıimdilikke qoljetkizý ádisterin is júzinde paıdalanyp kóredi. Semınar-trenıngtiń eki kúni ishinde qatysýshylar áleýetti, koých-ustanymyn iske asyrý strategııasy retinde koýchıngtiń ósýi men damýy úshin qajetti keńistik uǵymdarymen tanysady , sondaı-aq kúndelikti tirshilik áreketinde tabysty strategııalardy sińirý algorıtmderi týraly biletin bolady.
Aıta keteıik, «Bolashaq» qaýymdastyǵy 2011 jyldan bastap biliktiligi joǵary trenerlerdi tarta otyryp bıznes jáne jeke adamnyń derbes ósýi jónindegi semınar-trenıngterdi ótkizip keledi. Semınarlardyń maqsaty - kóshbasshylyq áleýetti qalyptastyrý jáne damytý, «Qazaqstan-2050» Strategııasyn iske asyrý aıasynda jas mamandar men «Bolashaq» baǵdarlamasynyń stıpendıanttarynyń jeke tıimdilikterin arttyrý bolyp tabylady.
