Astanada bıyl qandaı iri jol jobalary aıaqtalady

— Elordanyń jol-kólik ınfraqurylymyn keshendi damytý jumysyn júrgizip jatyrmyz. Bıyl 50-ge jýyq jol nysanynda jumys júrip jatyr, onyń aıasynda jyl sońyna deıin taǵy 15 shaqyrym jol salynady.

Bul qalanyń kólik qozǵalysyn jaqsartyp, kólik jıi qatynaıtyn jol ýchaskelerindegi keptelisti azaıtýǵa múmkindik beredi.

«Táýelsizdik kóshesiniń Qabanbaı batyr dańǵylynan Hýseın ben Talal kóshesine deıingi qurylysy» jobasy boıynsha ınjenerlik jelilerdi, naqtyraq aıtqanda, nóser kárizi jelisi men sharýashylyq-turmystyq káriz júıesin, kabeldik arnany, jylý trassasyn jáne baılanys jelilerin, sondaı-aq káriz sorǵy stantsııasyn (KSS) salý jumysy júrip jatyr, — dep jazdy Jeńis Qasymbek.

Qazirgi ýaqytta jol tósemin salý jumysy qarqyndy júrip jatyr.

— Atalǵan jobany iske asyrý Máńgilik El men Turan dańǵyldaryndaǵy kólik keptelisin azaıtýǵa, sol sııaqty sol jaǵalaýdaǵy qurylys jumysy qarqyndy júrip jatqan Hýseın ben Talal kóshesi aýmaǵyn qajetti ınjenerlik ınfraqurylymmen qamtamasyz etýge múmkindik beredi. Jobany iske asyrý qajettiligi osy aýmaqta qurylys jumysynyń qarqyndy júrgizilýine jáne onyń odan ári damýyna, sonyń ishinde jańa nysandardyń, atap aıtqanda, «Mega» saýda-oıyn-saýyq ortalyǵynyń salynýyna baılanysty týyndap otyr, — dedi qala basshysy.

Ol qarasha aıynyń sońyna deıin ýchaskeniń boıynda joldyń bir jaǵymen kólik qozǵalysyn tolyqtaı qamtamasyz etýdi josparlap otyrǵanyn aıtty.

— Jangeldın kóshesiniń qurylysy K. Kúmisbekov jáne Sh. Beısekova kósheleriniń arasyndaǵy kólik qatynasyn qamtamasyz etedi, sol sııaqty № 65 mektep-gımnazııasyna, tehnıkalyq kolledjge jáne «Bilim-Innovatsııa» mektep-ınternatyna kólikpen jetýdi yńǵaılaı túsedi. Qazirgi ýaqytta ınjenerlik jelilerdi júrgizý jáne jol tósemin salý jumysy júrip jatyr. Bıyl 10 qarashaǵa deıin jobanyń barlyq ýchaskesinde kólik qozǵalysyn qamtamasyz etýdi josparlap otyrmyz.

«N. Tilendıev dańǵyly men Sh. Beısekova kóshesiniń qıylysynda eki deńgeıli jolaıryq salý» jobasy aıasynda qurylys jumysy qarqyndy júrip jatyr. Kópirdiń metall konstrýktsııasyn qurastyrý jumysy tolyq aıaqtaldy. «Astyqjan» saýda úıi jaǵyndaǵy ýchaskede asfaltbeton jabynynyń ekinshi qabatyn tóseý jumysy aıaqtaldy, — dedi ol.

Injenerlik kommýnıkatsııalardy tartý boıynsha negizgi jumystyń 90%-y aıaqtaldy. Sý qubyry, sharýashylyq-turmystyq jáne nóser kárizi jelileri, jylý jelileri men baılanys jelileri salyndy.

— Sonymen qatar, Seıfýllın kóshesi jaǵynda da jumys qarqyndy júrip jatyr. Qazirgi ýaqytta jol tósemin salý jáne asfalt tóseý úshin negiz daıyndaý jumysy atqarylýda, sondaı-aq ınjenerlik jelilerdi júrgizý jumysy júrip jatyr.

Atalǵan jobany iske asyrý Aqan seri, Sh. Qosshyǵululy jáne K. Kúmisbekov kóshelerindegi kólik júktemesin azaıtýǵa, sondaı-aq Kóktal men Agroqalashyq eldi mekenderiniń turǵyndary úshin kólik qatynasyn jaqsartýǵa múmkindik beredi. Budan bólek, jańa jolaıryq elordanyń sol jaǵalaýy men Sh. Aıtmatov kóshesi arqyly Úrker eldi mekenine aparatyn baǵyttaǵy qalanyń oń jaǵalaýyn baılanystyratyn kólik qozǵalysyn jaqsartady, — dedi Jeńis Qasymbek.

«Tilendıev dańǵylynan Beıbarys Sultan kóshesine deıingi ýchaskede Abaıdyń 150 jyldyǵy kóshesin salý» jobasy iske asyrylyp jatyr. Qazirgi ýaqytta jol tósemin salý jumysy júrgizilýde. Jyl sońyna deıin kólik qozǵalysyn qamtamasyz etý josparlanyp otyr.

— Prıgorodnyı eldi mekenindegi kóshelerdi salý. Mestnaıa 7 jáne E522 kósheleri (jobalyq ataýlary)» jobasy aıasynda E522 kóshesinde nóser sýy kárizi salyndy. Qazirgi ýaqytta sý qubyry jelilerin salý jáne jol tósemi jumysy júrip jatyr. Qazirgi ýaqytta asfaltbeton jabynynyń tómengi qabatynyń 600 metrine asfalt tóseldi. Qazan aıynyń sońyna deıin E522 kóshesinde kólik qozǵalysyn qamtamasyz etý josparlanyp otyr.

Elordanyń barlyq aýdanynda jol jóndeý jáne qurylys jumysy júrip jatyr. Merdiger uıymdarǵa belgilengen merzimderdi qatań saqtaý jáne tıisti sapada oryndalýyn qamtamasyz etý tapsyryldy, — dep jazdy Jeńis Qasymbek.

Aıta ketelik Qazaqstanda qurylys qarqyny artty: 9 aıda 7,8 trln teńgeniń jumysy oryndalǵan edi.