Astanada bıyl 800-ge tarta esirtkige qatysty quqyqbuzýshylyq tirkeldi
ASTANA. KAZINFORM – Astanada nashaqorlyqtyń aldyn alý jáne esirtki qylmysyna qarsy is-qımyl jumystary jalǵasyp jatyr. Ásirese jastar men jasóspirimderdi esirtkiniń zańsyz aınalymyna tartýdan qorǵaýǵa, sondaı-aq sıntetıkalyq esirtki daıyndaıtyn narkolaboratorııalardyń qyzmetin anyqtap, jolyn kesýge erekshe nazar aýdarylýda, dep habarlaıdy Astana ákimdiginiń resmı saıty.
Qabyldanyp jatqan sharalar týraly qalalyq Kommýnıkatsııalar qyzmetinde ótken brıfıngte elorda Polıtsııa departamentiniń Esirtki qylmysyna qarsy is-qımyl basqarmasy bastyǵynyń orynbasary, polıtsııa polkovnıgi Erkesh Qalyqov baıandady.
Spıkerdiń málimetinshe, 2025 jyldyń basynan beri elordada 797 esirtki quqyqbuzýshylyǵy tirkelgen, onyń ishinde 238-i – satý faktisi. Zańsyz aınalymnan 406,5 kılogramm esirtki zattary tárkilengen, onyń ishinde 37 kılogramm sıntetıkalyq zattar bar.
Astanada prokýratýra men Polıtsııa departamentiniń úılestirýimen esirtki qylmysyna qarsy is-qımylǵa arnalǵan aılyq jalǵasyp jatyr. Negizgi kóńil iri esirtki jetkizýshilerin áshkereleýge, narkolog-dárigerler men Psıhıkalyq densaýlyq ortalyǵy mamandarynyń qatysýymen jastarmen profılaktıkalyq kezdesýler ótkizýge bólinýde.
Sonymen qatar, PIK (MIB) jáne kópqabatty úı turǵyndarymen ózara is-qımyl jandandyryldy.
Quqyq qorǵaý organdary turǵyndarǵa úndeý jasaıdy: eger esirtkini saqtaý nemese satý faktilerin baıqasańyzdar, birden Esirtki qylmysyna qarsy is-qımyl basqarmasynyń anonımdi senim telefondaryna nemese «102» arnasy arqyly habarlańyzdar.
«Esirtki jarnamasy jelide erekshe problema bolyp otyr. Áleýmettik jelilerde kún saıyn jasyryp ketý týraly habarlandyrýlar, sondaı-aq ınternet-dúkenderdiń mekenjaılary kórsetilgen graffıtı sýretteri jarııalanady. Búginde esirtkini «baılanyssyz tásilmen», ıaǵnı qarapaıym izdeý júıelerin qoldanyp satyp alýǵa bolady. Mundaı kontentti anyqtaý jáne buǵattaý úshin ınternet keńistigin kúndelikti baqylaıtyn arnaıy monıtorıng toby quryldy.
Polıtsııa departamentiniń bastamasymen «Smart Astana» platformasynda «Ótinish jiber – Esirtkige jol joq!» qosymshasy iske qosyldy. Ol qala turǵyndaryna esirtki jarnamasy men satý oryndary týraly jedel habarlaýǵa múmkindik beredi. Barlyq ótinishter polıtsııaǵa túsip, qysqa merzimde tyıym salynǵan aqparatty joıý, graffıtı men japsyrmalardy óshirý boıynsha sharalar qabyldanady. Nátıjeleri týraly ótinish berýshige arnaıy Telegram-arna arqyly habarlanady», – dedi spıker.
Tek 2025 jyldyń basynan beri elordada 600-den astam esirtki jarnamalaǵan saıt buǵattaldy. Budan bólek, QR QK-niń 299-1-baby (esirtki quraldaryn nasıhattaý jáne zańsyz jarnamalaý) boıynsha 11 qylmystyq is tirkeldi.
Memleket basshysynyń tapsyrmalary men 2023–2025 jyldarǵa arnalǵan nashaqorlyqqa qarsy is-qımyldyń keshendi josparyn iske asyrý maqsatynda elorda ákimi «Astana – esirtkisiz qala» is-sharalar josparyn bekitti.
Osy jospar aıasynda memlekettik organdardyń, úkimettik emes uıymdardyń, eriktiler men jastar qozǵalystarynyń, sport birlestikteriniń birlesken jumysy uıymdastyrylýda. Tek bıyldyń ózinde Astanada 460 profılaktıkalyq shara ótkizildi: mektepter men ýnıversıtetterdegi kezdesýlerden bastap sporttyq aktsııalar men qoǵamdyq naýqandarǵa deıin.
«Esirtki qaterine qarsy kúres keshendi tásildi talap etedi, ıaǵnı memleket pen qoǵamnyń kúshin biriktirýdi qajet etedi.
Polıtsııa men elorda ákimdigi atap ótkendeı, tek turǵyndardyń, jastar uıymdary men azamattyq belsendilerdiń belsendi qatysýy arqyly ǵana qoǵamda esirtkige qarsy turaqty ımmýnıtet qalyptastyrýǵa bolady», – dep túıindedi spıker.
Aıta keteıik, Esirtki taratty dep kúdikke ilingen qazaqstandyqtar Chernogorııada qamaýǵa alyndy.