Astanada bıyl 500-den astam esirtki graffıtıleri anyqtalyp, boıaldy
ASTANA. KAZINFORM – Astanada prokýratýranyń úılestirýimen qalalyq polıtsııa esirtki qylmysyna qarsy aılyq ótkizip jatyr. Іs-sharalar kesheni «Zań jáne tártip» qaǵıdaty aıasynda júzege asyrylýda. Osyǵan oraı qalada blogerlerdiń, eriktilerdiń jáne memlekettik organdar ókilderiniń qatysýymen esirtki graffıtılerin anyqtaý jáne boıaý aktsııasy ótti, dep habarlaıdy elorda ákimdiginiń resmı saıty.
Esirtkige qarsy aktsııasy Baıqońyr aýdanynda ótti. Qatysýshylar jasyryn esirtki jarnamasy bar, messendjerler arqyly tyıym salynǵan zattardy satýǵa shaqyratyn siltemeler jazylǵan jazýlardy anyqtap, boıady. Mundaı graffıtıler kóbinese turǵyn úılerdiń qasbetterinde, transformatorlyq qosalqy stantsııalarda, qorshaýlarda jáne basqa da qoǵamdyq nysandarda salynady.
Sharany Baıqońyr aýdany ákimdigi, «Astana Jastary» jastar qanaty aýdan prokýratýrasynyń, Polıtsııa basqarmasynyń jáne eriktiler birlestikteriniń qoldaýymen uıymdastyrdy.
Baıqońyr aýdany ákimdiginiń Іshki saıasat bóliminiń basshysy Arman Baıanbekovtyń aıtýynsha, mundaı sharalardyń maqsaty – zańsyz jarnamany joıý ǵana emes, sonymen birge azamattarda, ásirese jastarda esirtki nasıhatyna qarsy ımmýnıtet qalyptastyrý.
«Belsendilermen, jastar uıymdarymen jáne aýdan turǵyndarymen birge biz esirtki jarnamasynyń kórinisterine júıeli túrde qarsy kúresemiz. Basty maqsatymyz – jas urpaqty qorǵaý jáne taza, jaıly ári qaýipsiz ómir súrý keńistigin qalyptastyrý», – dep atap ótti ol.
Aktsııaǵa belsendiler men eriktilerden bólek, tanymal qazaqstandyq blogerler de tartyldy. Olar jazýlardy boıap qana qoımaı, áleýmettik jelilerde bul protsesti keńinen jarııalap, esirtki jarnamasyna qarsy ıdeıany keń aýdıtorııaǵa taratty.
«Árkim ortaq iske úles qosa alatynyn kórsetý mańyzdy. Biz tek jazýlardy óshirip qana qoımaı, olarǵa belgi beremiz. Esirtki jarnamasyna bizdiń qalamyzda oryn joq», – dedi qoǵam belsendisi, bloger Aıdana Habıeva.
Baıqońyr aýdany prokýratýrasynyń ókili Tórekeldi Jankeldiuly mundaı sharalardyń esirtki aınalymyna qatysty qylmystardyń aldyn alýda mańyzdy ról atqaratynyn aıtty.
«Bul jazýlardyń mańyzy joq kórinýi múmkin, biraq shyn máninde olar – qylmystyq bıznestiń quraly. Osyndaı jarnamany der kezinde anyqtap, joıý, sondaı-aq jastarǵa esirtkini qoldanýdyń saldaryn túsindirý óte mańyzdy», – dedi ol.
Shara barysynda aǵartýshylyq jumysqa da erekshe kóńil bólindi. Qatysýshylar turǵyndarǵa aktsııanyń maqsatyn túsindirip, esirtki graffıtılerin qarapaıym kóshe sýretterinen qalaı ajyratýǵa bolatynyn kórsetti jáne kúmándi jazýlardy tıisti organdarǵa habarlaýǵa shaqyrdy.
«Biz jastardyń belsendi azamattyq ustanymyn qalyptastyrýǵa tyrysamyz. Mundaı aktsııalar jastardy áleýmettik mańyzdy iske tartyp, olardyń qatysýy qalanyń qaýipsizdigi men beınesine shynaıy yqpal etetinin kórsetedi. Ortaq kúsh-jigerimizben qoǵamdyq oryndardaǵy esirtki jarnamasynyń taralýyn azaıta alamyz dep senemiz», – dedi «Astana Jastary» jastar resýrstyq ortalyǵynyń jetekshisi Sultan Ómirǵalıev.
Baıqońyr aýdandyq polıtsııa basqarmasy bastyǵynyń orynbasary Daýlet Elgonovtyń aıtýynsha, jyl basynan beri elordada 500-den astam osyndaı graffıtı anyqtalyp, boıalǵan.
«Biz mundaı oryndardy múmkindiginshe jyldam anyqtaýǵa tyrysamyz. Qala turǵyndary telefon nemese qosymshalar arqyly kúmándi jazýlar jaıly habarlap, belsendi kómek kórsetýde. Árbir jaǵdaıdy tirkep, shara qabyldaımyz», – dep túsindirdi ol.
Uıymdastyrýshylardyń aıtýynsha, bul is-shara bir rettik aktsııa emes, jastar arasyndaǵy esirtkige jáne qylmysqa qarsy kúrestiń uzaq merzimdi baǵdarlamasynyń bir bóligi. Josparda – mundaı sharalardyń geografııasyn keńeıtý, mektep oqýshylary men stýdentterdi, bıznes ókilderin belsendi tartý, sondaı-aq jasóspirimderde esirtkini qoldanýǵa jáne quqyqqa qarsy áreketterge turaqty teris kózqaras qalyptastyrýǵa baǵyttalǵan bilim berý baǵdarlamalaryn iske asyrý bar.
Eske sala ketsek, Astanada «Zań jáne tártip» qaǵıdaty aıasynda esirtki qylmysyna qarsy aılyq jalǵasyp jatyr. > Astana news: Quqyq qorǵaýshylar birlesken reıdter, oqý oryndarynda profılaktıkalyq kezdesýler, sondaı-aq tyıym salynǵan zattardy taratatyn ınternet-resýrstardy anyqtaý jáne joıý jumystaryn júrgizip keledi.
Mundaı is-sharalar halyqtyń habardarlyǵyn arttyrýǵa, polıtsııa men qoǵam arasyndaǵy senimdi nyǵaıtýǵa, sondaı-aq esirtki qylmysy men qoǵamdyq qaýipsizdikke tónetin ózge de qaterlerge qarsy birlesken kúresti kúsheıtýge yqpal etedi.
Aıta keteıik, Astanada esirtki taratqan qyz 10 jylǵa sottaldy.