Astanada bıyl 5 myńnan astam ata-ana jaýapqa tartyldy
ASTANA. KAZINFORM — Elorda kóshelerinde eresekterdiń qaraýynsyz júrgen kámeletke tolmaǵandar áli de kóp kezdesedi. Mundaı jaǵdaılar balalardyń qaýipsizdigin qamtamasyz etý jáne quqyq buzýshylyqtyń aldyn alý maqsatynda ótkiziletin túngi reıdter barysynda anyqtalyp otyr, dep habarlaıdy Polisia.kz.
Jyl basynan beri Qazaqstan Respýblıkasy Ákimshilik quqyq buzýshylyq týraly kodeksiniń 442-baby boıynsha kámeletke tolmaǵandardyń zańda belgilengen ýaqyttan keıin turǵyn úıden tys jerde bolýyna jol bergen 5 324 zańdy ókil ákimshilik jaýaptylyqqa tartyldy.
Kezekti profılaktıkalyq is-shara barysynda túngi saǵat bir shamasynda polıtsııa qyzmetkerleri jasy 12 men 16 aralyǵyndaǵy jasóspirimder tobyn anyqtady. Olar eresekterdiń qaraýynsyz elordadaǵy turǵyn úı keshenderiniń biriniń mańynda júrgen. Jasóspirimder polıtsııa bólimine jetkizilip, keıin zańdy ókilderine tapsyryldy. Ata-analaryna qatysty ákimshilik yqpal etý sharalary qoldanyldy.
— Polıtsııa Qazaqstan Respýblıkasynyń qoldanystaǵy zańnamasyna sáıkes kámeletke tolmaǵandarǵa túngi ýaqytta zańdy ókilderiniń erip júrýinsiz turǵyn úıden tys jerde bolýǵa tyıym salynatynyn eske salady. Ata-analardy balalarynyń qaıda júrgenin baqylaýǵa, olarmen únemi baılanysta bolýǵa jáne aralasatyn ortasyn bilýge shaqyramyz. Balalardyń qaraýsyz qalýynyń jáne kámeletke tolmaǵandar arasyndaǵy quqyq buzýshylyqtardyń aldyn alý polıtsııa qyzmetiniń basym baǵyttarynyń biri bolyp qala beredi, — delingen aqparatta.
Aıta keteıik, Atyraýda 25 ata-ana ákimshilik jaýapkershilikke tartyldy.
