Astanada bıyl 15 zańsyz nysan súrildi
ASTANA. KAZINFORM — Astanada 2025 jyly sáýlet-qurylys baqylaýy nátıjesinde 576 jospardan tys tekserý júrgizilip, 308 oryndalýy mindetti nusqama berilgen, 764 aıyppul salyndy, onyń jalpy somasy 308 mln teńgeden asty.
2025 jylǵy 27 qarashada qala ákiminiń birinshi orynbasary N.Núrkenovtiń tóraǵalyǵymen memlekettik sáýlet-qurylys baqylaýy basqarmasynyń basshysy, prokýratýra, polıtsııa, Eńbek ınspektsııasy komıtetiniń departamenti men memlekettik organdar jáne qurylysshylardyń qatysýymen keńes ótti.
Astananyń qurylys salasyndaǵy ózekti máselelerdiń biri — ruqsatsyz qurylys, jobalyq, qalalyq jáne qaýipsizdik talaptaryn buzyp nysan salý bolyp otyr.
— 2025 jyly sáýlet-qurylys baqylaýy nátıjesinde 576 jospardan tys tekserý júrgizilip, 308 oryndalýy mindetti nusqama berilgen, 764 aıyppul salyndy, onyń jalpy somasy 308 mln teńgeden asty. Qalada qazirgi ýaqytta shamamen 1263 nysan salynyp jatyr, onyń 322-si kóppáterli turǵyn úıler, — delingen ákimdik habarlamasynda.
Qala ákimdiginiń málimetinshe 2025 jyly Astanada sot sheshimderi men memlekettik sáýlet-qurylys baqylaýynyń nusqamalary negizinde 15 nysan buzylǵan.
Memlekettik sáýlet-qurylys baqylaýy basqarmasynyń basshysy Ǵanı Tajıev zań talaptaryn elemeýge, sapany únemdeýge nemese normalardy buzýǵa árekettenetin kez kelgen jaǵdaı jaýapkershilik sharalary qoldanylatyndyǵyn, sonyń ishinde qurylys jumystaryn toqtatý jáne aıyppul salý qarastyrylatynyn atap ótti.
Sonymen qatar, Prezıdent tapsyrmalaryn oryndaý aıasynda turǵyn úılerdi zańsyz satý áreketterin toqtatý boıynsha sharalar qabyldanyp jatqany eske salyndy, onyń ishinde «Turǵyn úı qurylysynda úleskerlerdiń qatysýy týraly» zańǵa ózgerister engizildi. Zań buzýshylyqtar úshin 1000-2000 AEK kóleminde aıyppul qarastyrylǵan, bul 7,8 mln teńgeden asady.
Aıta ketelik Astana ákimdigi kólik keptelisin azaıtý úshin tsıfrlyq basqarýdy engizetini týraly jazǵan edik.