Astanada bıyl 1,1 mln-nan astam jasyl jelek otyrǵyzylady
ASTANA. KAZINFORM – Astanada kógaldandyrý jáne abattandyrý jumystary jalǵasyp jatyr. Bıyl elordada 1,1 mln-nan astam jasyl jelek otyrǵyzý josparlanǵan. Bul týraly Astana qalasy Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Samat Abdýllın málim etti.
Onyń aıtýynsha, jospar boıynsha qalada 70 myń aǵash, 600 myńnan astam sándik-gúldi buta, tiri qorshaýlarǵa arnalǵan 40,5 myń ósimdik jáne ózge de jasyl jelek otyrǵyzylady. Jumys elordanyń barlyq alty aýdanyn qamtıdy.
Qazirgi ýaqytta Astanada 4 mln-nan astam jasyl jelek bar. Budan bólek, «Jasyl beldeý» aýmaǵynda 14 mln-ǵa jýyq jasyl jelek ósedi. Qalada jyl saıyn keminde 1 mln aǵash, buta, kóshet pen gúl otyrǵyzylady.
Jyl basynan beri elordada 700 myńnan astam jasyl jelek egildi. Onyń ishinde 21 myń aǵash, 303,4 myń sándik-gúldi buta, tiri qorshaýlarǵa arnalǵan 28 myń ósimdik, 130,7 myń buta jáne 249,2 myń kópjyldyq gúl bar.
– Іri kólemdi aǵashtar men kópjyldyq butalarǵa erekshe kóńil bólinedi. Ósimdik túrlerin tańdaý kezinde elordanyń klımattyq jaǵdaıy eskeriledi. Kúzgi kezeńde taǵy 234 myń jasyl jelek otyrǵyzý josparlanyp otyr, – dedi Samat Abdýllın.
Kógaldandyrý saıabaqtar men skverlerde ǵana emes, qalanyń negizgi magıstraldary boıynda da júrgizilip jatyr. Tarlan Astana jelisi, Syǵanaq jáne Qabanbaı batyr kósheleriniń boıynda jańa kóshetter otyrǵyzylýda.
Sonymen qatar Greenline jaıaý júrginshiler býlvarynyń ekinshi kezeńin kógaldandyrý jalǵasyp jatyr. Munda serýendeý baǵyttary, jasyl keńistikter, sporttyq jáne oıyn alańdary qarastyrylǵan.
Esil ózeniniń boıynda Prezıdent saıabaǵy, Beıbitshilik jáne kelisim saıabaǵy, Trıatlon-park jáne basqa da rekreatsııalyq aýmaqtardy biriktiretin saıabaq klasteri qalyptastyrylyp jatyr.
Qalanyń alty aýdanynda da kógaldandyrý jumystary júrgizilýde. Atap aıtqanda, Almaty aýdanynda Nájimedenov kóshesi men «Táýelsizdik» kópiri aýmaǵy, Baıqońyr aýdanynda Abaı dańǵyly men Kenesary, Pýshkın jáne Táshenov kósheleri, Esil aýdanynda Kereı-Jánibek handar kóshesi, Uly Dala jáne Qabanbaı batyr dańǵyldary kógaldandyrylyp jatyr.
Nura aýdanynda Syǵanaq, Aıtmatov jáne Gapeev kósheleri boıynda jasyl aımaqtar qalyptastyrylsa, Saraıshyq aýdanynda Qoshqarbaev dańǵylynyń bir bóligi abattandyryldy. Saryarqa aýdanynda Kúmisbekov jáne Kenesary kóshelerin kógaldandyrýǵa basymdyq berilgen.
Basqarma ókiliniń aıtýynsha, jańa kóshetter otyrǵyzýmen qatar, buryn qalyptastyrylǵan jasyl qordy kútip-baptaýǵa da erekshe kóńil bólinedi. Aǵashtar men butalar sýarylyp, zııankester men aýrýlarǵa qarsy óńdeledi, tyńaıtqyshtar engizilip, sýarý júıeleri qalpyna keltiriledi.
Sońǵy jyldary elordada 500-ge jýyq qoǵamdyq jáne aýla keńistigi abattandyrylǵan.
Aıta keteıik, buǵan deıin Memleket basshysy «Taza Qazaqstan» respýblıkalyq ekologııalyq aktsııasyna qatysyp, Prezıdent saıabaǵynda jas ekobelsendilermen birge aǵash otyrǵyzǵan bolatyn.
