Astanada beınekameranyń kómegimen kólik aıdaýshylar ustaldy
ASTANA. 6 aqpan. QazAqparat - Astanalyq departamenttiń jedel basqarý ortalyǵy elordadaǵy jaǵdaıdy táýlik boıy baqylap otyrady.
Qalalyq ІІD-niń baspasóz qyzmetinen habarlanǵandaı, qazirgi ýaqytta elordada 649 kamera bar, olar adamdardyń kóp baratyn jerlerin jáne qıylystardaǵy jaǵdaıdy baqylaýǵa septigin tıgizedi. Sondaı-aq beınekameranyń kómegimen qylmystar «izi sýymaı» ashylady.
Máselen, Saryarqa aýdanynyń ІІB-ne Astana qalasynyń turǵyny shaǵymdandy. Onyń aıtýynsha, belgisiz bireýler saýda úıiniń janynda turaqta turǵan «Toıota kamrı» kóligin urlap áketken.
Beınekameranyń kómegimen polıtsııa qyzmetkerleri kólik urlaýmen aınalysqan adamdardy anyqtady. Olar 1989 jáne 1991 jylǵy Astana qalasynyń eki turǵyny bolyp shyqty. QR QK-niń 175 baby boıynsha qylmystyq is qozǵaldy. Ustalǵandar Astana qalasy ІІD-niń ýaqytsha oqshaýlaý abaqtysyna qamaldy. Tergeý amaldary júrgizilýde.
