Astanada beınebaqylaý kameralarynyń sany bir jylda eki esege artty
ASTANA. KAZINFORM – Premer-mınıstr Oljas Bektenovtiń tóraǵalyǵymen ótken vedomstvoaralyq komıssııa otyrysynda Astana qalasynyń ákimi Jeńis Qasymbek elordanyń kólik júıesin damytý jáne quqyq buzýshylyqtardyń aldyn alý boıynsha atqarylyp jatqan jumystar týraly baıandady. Bul týraly Úkimettiń baspasóz qyzmeti habarlady.
— Kólik jaǵdaıyn jaqsartý jáne qaýipsizdikti arttyrý maqsatynda kólik júıesin damytýdyń keshendi baǵdarlamasy júzege asyrylyp jatyr. Avtoturaq keńistigin, kólik aǵyndaryn, baǵdarshamdyq retteýdi, evakýatsııalaýdy, kóliktik josparlaýdy jáne jazataıym oqıǵalar sanyn azaıtý jónindegi ózge de sharalardy úılestirý úshin jol qozǵalysyn uıymdastyrý ortalyǵy — Biryńǵaı operator quryldy. Ortalyq ıntellektýaldy kólik júıesimen (ITS) jol qozǵalysyn basqarýdy qamtamasyz etedi. Búgingi tańda 818 baǵdarshamnyń 582-si beıimdelgen. Bıyl beıimdeý tolyǵymen aıaqtalady dep josparlanyp otyr, — dedi Jeńis Qasymbek.
Sonymen qatar elordada jańa baǵdarshamdar ornatý jumystary jalǵasýda. Presight AI Ltd kompanııasymen birlesip, beınebaqylaý ınfraqurylymy jańǵyrtylýda. Bıyl 1200 jol qozǵalysy erejesin buzýdy esepke alý júıesin paıdalanýǵa múkindik beretin Smart City jobasy iske qosyldy. 60 myńnan astam kamera biryńǵaı ahýal ortalyǵymen biriktiriledi.
Ákimniń málimetterge sáıkes, qaladaǵy beınebaqylaý kameralarynyń sany bir jylda 2 esege artyp, 60 myń birlikke jetti. Jańǵyrtý nátıjesinde avtomatty túrde tirkeletin buzýshylyqtar sany 4-ten 15-ke deıin artady, sondaı-aq jasandy ıntellekt negizinde beıne taldaýdyń 35 túri engiziledi dep kútilýde. Bul elordadaǵy jol-kólik oqıǵalary sanyn azaıtýǵa múmkindik beredi.
Aıta ketelik ortasha jyldamdyqty qadaǵalaý júıesi avtojoldardyń taǵy 18 ýchaskesinde keńeıtiledi.
