Astanada beıbereket qurylys jumystary júrgizilmeıtin bolady - I.Tasmaǵambetov
ASTANA. 11 sáýir. QazAqparat - Astanada beıbereket qurylys jumystary júrgizilmeıtin bolady.
Bul týraly búgin Elbasy N.Nazarbaevtyń qatysýymen ótip jatqan elordanyń ári qaraı damýy máselerine arnalǵan keńes barysynda Astana qalasynyń ákimi Imanǵalı Tasmaǵambetov málim etti.
«Jeke turǵyn úı qurylysy tek qana biryńǵaı qala qurylysy erejesine sáıkes júrgiziledi. Bul jumystarǵa biz tolyǵymen kiristik ári budan keıin qalada beıbereket qurylys jumystary júrgizilmeıtin bolady», - dep atap ótti I.Tasmaǵambetov.
Sonymen qatar, qala basshysynyń atap ótýinshe, qurylys sapasyna qatysty jańa qurylys erejelerine basa nazar aýdarylatyn bolady. Atap aıtqanda, bul erejelerde ǵımarattardyń qasbetterin árleýde tek qana granıt, mármár, travetın jáne qazirgi zamanaýı materıaldardy ǵana paıdalaný qarastyrylǵan.
«Baspananyń sanatyna baılanysty sýmen jabdyqtaýdyń jekelegen júıelerin, ınjenerlik elementterdi ornalastyrý reglamentteledi », - dedi ákim.
