Astanada besinshi synyptyń oqýshysyn óltirgen qańǵybastar ustaldy - ІІD
ASTANA. 2 qarasha. QazAqparat - Astanada besinshi synyptyń oqýshysyn óltirgen qańǵybastar ustaldy. Bul týraly Іshki ister departamentiniń baspasóz qyzmetinen habarlady.
Málim bolǵandaı, ústimizdegi jylǵy 16 qazanda Astana qalasynyń Іshki ister departamentine elorda turǵyny habarlasyp, 1998 jyly týǵan, qala mektepteriniń birinde 5-inshi synypta oqıtyn ulynyń joǵalǵandyǵyn aıtty.
Balany izdestirýge polıtsııanyń barlyq kúshteri men qurylymy jumyldyryldy. 20 qazan kúni sý qubyrynyń qudyǵynda zorlyqpen óltirilgen balanyń máıiti tabyldy. Sot-medıtsınalyq saraptamanyń aktisine sáıkes, bala mehanıkalyq asfıksııadan (tunshyǵý) kóz jumǵan.
Asa aýyr qylmysty tergeý Astana qalalyq ІІD basshylyǵynyń jeke baqylaýyna alyndy. Tergeý barysynda polıtsııa qyzmetkerleri birden birneshe paıymdy usyndy. Qanipezerdi anyqtaý maqsatynda shuǵyl qyzmetkerler kóptegen adamnan jaýap aldy. Nátıjesinde polıtsııa qyzmetkerleri, qylmysty qylmys jasalǵan jerde udaıy boı kórsetip júrgen, turaqty turǵylyqty jerleri joq qańǵybastar jasaǵandyǵyn anyqtady.
Shuǵyl-izdestirý is-sharalardyń barysynda polıtseıler Aqmola oblysynyń eki týmasyn quryqtady. 1987 jáne 1989 jyly týǵan azamattar qylmysty buzaqylyq maqsatta jasaǵandyǵyn aıtty. Olardyń biri buryn isti bolǵan.
Fakti boıynsha QR QK-niń 96 baby boıynsha qylmystyq is qozǵaldy. Ustalǵandar Astana qalasynyń Ýaqytsha ustaý abaqtysyna jetkizildi. Tergeý amaldary júrgizilýde.
